Kezdesý barysynda taraptar saýda-ekonomıkalyq, áleýmettik-gýmanıtarlyq, mádenı baılanystar tóńireginde áńgime órbitip, pikir almasty.
Óńir basshysy qonaqtarǵa Ońtústik Qazaqstan oblysynyń ekonomıkalyq damý qarqynyn baıandap, sheteldik ınvestorlarǵa kórsetiletin barlyq jeńildikterdi túsindirdi.
– Ońtústik Qazaqstan oblysy – agrarly óńir. Bizde jylyna 300 myń tonna maqta óndiriledi. Óńirde negizinen aýyl sharýashylyǵy salasyna basymdyq berilgen. Oblys jemis-jıdek, kókónis, baý-baqsha ónimderin óndiredi. Aýmaqtyń ındýstrıaldy áleýeti jyl sanap jaqsaryp, búginde 11 ındýstrıaldy, 1 ekonomıkalyq arnaıy aımaǵymyz jumys isteıdi. Atalǵan aımaqtarda ınfraqurylymdyq qajettelikter tolyǵymen qamtamasyz etilip, sheteldik ınvestorlarǵa barlyq jeńildikter qarastyrylǵan, – dedi Janseıit Túımebaev.
Al vengrlik meımandar eki el arasyndaǵy qarym-qatynastyń odan ári damı túsetinine senim bildirdi. Keleshekte mádenı-gýmanıtarlyq, saýda-ekonomıkalyq qarym-qatynastardy jandandyryp, ásirese aýyl sharýashylyǵy salasynda tyǵyz jumys isteýge nıetti ekendikterin jetkizdi.
«Vengrıa – Qazaqstannyń mańyzdy saýda-ekonomıkalyq áriptesi. Eki el arasynda Qazaqstan-Vengrıa strategıalyq keńesi, ekonomıkalyq yntymaqtasyq jónindegi úkimetaralyq komısıa, İskerlik keńes, sondaı-aq, tikeleı ınvestısıalar boıynsha Qazaqstan men Vengrıanyń birlesken qory jumys isteıdi. Osy múmkindikterdi paıdalanyp, Ońtústik Qazaqstan oblysynda birlesken kásiporyndar qurý týraly kelisimder júrgizetin ýaqyt jetti. Bul qadamdar eki el arasyndaǵy ózara qarym-qatynasty odan ári arttyrary sózsiz», – dedi Vengrıanyń Almatydaǵy bas konsýly Blaýmann Ferens.
Aıta keteıik, Ońtústik Qazaqstan oblysymen men Vengrıanyń saýda-sattyq baılanysy 2017 jyldyń birinshi jarty jyldyǵynda 1 mln AQSH dollaryn qurady. 2017 jyldyń 28 qańtary kúni óńirimizge Vengrıanyń syrty ekonomıkalyq baılanys jáne syrtqy ister mınıstrliginiń memlekettik hatshysy Mıkola Ishtvanaı men Vengrıanyń Qazaqstandaǵy elshisi Andrash Baranı arnaıy kelgen bolatyn. Sol kezde Shymkentte Vengrıanyń qurmetti konsýldyǵy ashylyp, qurmetti konsýl bolyp Qaırat Moldaseıitov taǵaıyndalǵan edi. Búgingi kezdesýdiń qorytyndysynda qonaqtar oblys basshysyna Vengrıaǵa arnaıy kelip-ketýdi usyndy.
OQO ákiminiń baspasóz qyzmeti
