وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ ۆەنگريادان كەلگەن ءبىر توپ دەلەگاسيامەن كەزدەستى. دەلەگاسيا قۇرامىندا ياس نادكۋن سولنيۋك ايماعىنىڭ ءماجىلىس ءتوراعاسى شاندور كوۆاچ، ۆەنگريانىڭ الماتىداعى باس كونسۋلى بلاۋمانن فەرەنس، ۆەنگريانىڭ قازاقستانداعى قۇرمەتتى كونسۋلى لاسلو حورۆات بار.

كەزدەسۋ بارىسىندا تاراپتار ساۋدا-ەكونوميكالىق، الەۋمەتتىك-گۋمانيتارلىق، مادەني بايلانىستار توڭىرەگىندە اڭگىمە ءوربىتىپ، پىكىر الماستى.

ءوڭىر باسشىسى قوناقتارعا وڭتۇستىك قازاقستان وبلىسىنىڭ ەكونوميكالىق دامۋ قارقىنىن بايانداپ، شەتەلدىك ينۆەستورلارعا كورسەتىلەتىن بارلىق جەڭىلدىكتەردى ءتۇسىندىردى.

– وڭتۇستىك قازاقستان وبلىسى – اگرارلى ءوڭىر. بىزدە جىلىنا 300 مىڭ توننا ماقتا وندىرىلەدى. وڭىردە نەگىزىنەن اۋىل شارۋاشىلىعى سالاسىنا باسىمدىق بەرىلگەن.  وبلىس جەمىس-جيدەك، كوكونىس، باۋ-باقشا ونىمدەرىن وندىرەدى. اۋماقتىڭ يندۋستريالدى الەۋەتى جىل ساناپ جاقسارىپ، بۇگىندە 11 يندۋستريالدى، 1 ەكونوميكالىق ارنايى ايماعىمىز جۇمىس ىستەيدى. اتالعان ايماقتاردا ينفراقۇرىلىمدىق قاجەتتەلىكتەر تولىعىمەن قامتاماسىز ەتىلىپ، شەتەلدىك ينۆەستورلارعا بارلىق جەڭىلدىكتەر قاراستىرىلعان، – دەدى جانسەيىت تۇيمەبايەۆ.

ال ۆەنگرلىك مەيماندار ەكى ەل اراسىنداعى قارىم-قاتىناستىڭ ودان ءارى دامي تۇسەتىنىنە سەنىم ءبىلدىردى. كەلەشەكتە مادەني-گۋمانيتارلىق، ساۋدا-ەكونوميكالىق قارىم-قاتىناستاردى جانداندىرىپ، اسىرەسە اۋىل شارۋاشىلىعى سالاسىندا تىعىز جۇمىس ىستەۋگە نيەتتى ەكەندىكتەرىن جەتكىزدى.

«ۆەنگريا – قازاقستاننىڭ ماڭىزدى ساۋدا-ەكونوميكالىق ارىپتەسى. ەكى ەل اراسىندا قازاقستان-ۆەنگريا ستراتەگيالىق كەڭەسى، ەكونوميكالىق ىنتىماقتاسىق جونىندەگى ۇكىمەتارالىق كوميسسيا، ىسكەرلىك كەڭەس، سونداي-اق، تىكەلەي ينۆەستيسيالار بويىنشا قازاقستان مەن ۆەنگريانىڭ بىرلەسكەن قورى جۇمىس ىستەيدى. وسى مۇمكىندىكتەردى پايدالانىپ، وڭتۇستىك قازاقستان وبلىسىندا بىرلەسكەن كاسىپورىندار قۇرۋ تۋرالى كەلىسىمدەر جۇرگىزەتىن ۋاقىت جەتتى.  بۇل قادامدار ەكى ەل اراسىنداعى ءوزارا قارىم-قاتىناستى ودان ءارى ارتتىرارى ءسوزسىز»، – دەدى ۆەنگريانىڭ الماتىداعى باس كونسۋلى بلاۋمانن فەرەنس.



ايتا كەتەيىك، وڭتۇستىك قازاقستان وبلىسىمەن مەن ۆەنگريانىڭ ساۋدا-ساتتىق بايلانىسى 2017 جىلدىڭ ءبىرىنشى جارتى جىلدىعىندا 1 ملن اقش دوللارىن قۇرادى.  2017 جىلدىڭ 28 قاڭتارى كۇنى وڭىرىمىزگە ۆەنگريانىڭ سىرتى ەكونوميكالىق بايلانىس جانە سىرتقى ىستەر مينيسترلىگىنىڭ مەملەكەتتىك حاتشىسى ميكولا يشتۆاناي مەن ۆەنگريانىڭ قازاقستانداعى ەلشىسى اندراش باراني ارنايى كەلگەن بولاتىن. سول كەزدە شىمكەنتتە ۆەنگريانىڭ قۇرمەتتى كونسۋلدىعى اشىلىپ، قۇرمەتتى كونسۋل بولىپ قايرات مولداسەيىتوۆ تاعايىندالعان ەدى. بۇگىنگى كەزدەسۋدىڭ قورىتىندىسىندا قوناقتار وبلىس باسشىسىنا ۆەنگرياعا ارنايى كەلىپ-كەتۋدى ۇسىندى.

 

وقو اكىمىنىڭ باسپا ءسوز قىزمەتى