Vatikandaǵy Sikstin kapellasynda ótken konklav nátijesinde Rim-katolik shirkeýiniń jańa basshysy sailandy. Daýys berýdiń tórtinshi kezeńinen keiin, jergilikti ýaqytpen 18:00-de kapella shatyrynan aq tútin shyǵyp, jańa Papanyń tańdalǵanyn bildirdi,- dep habarlaidy Dalanews.kz VVS basylymyna silteme jasap.
Jańa Rim Papasy bolyp amerikalyq Robert Franchesko Prevo sailanyp, XIV Lev esimin qabyldady. Ol – bul laýazymǵa kelgen alǵashqy amerikalyq. Taǵaiyndaýdan keiin shamamen bir saǵat ótkende jańa Papa Áýlie Petr alańyna jinalǵan myńdaǵan senýshiniń aldyna balkonnan shyqty. Jinalǵan jurt ony zor qýanyshpen qarsy aldy.
1955 jyly AQSh-tyń Chikago qalasynda dúniege kelgen Prevo erte jastan dini joldy tańdaǵan. Avgýstinshiler ordenine kirip, Rimde dini bilim alǵan. Ol shamamen 30 jyl boiy Perýde missionerlik qyzmet atqaryp, keiin eparhiialardy basqarǵan. Perý azamattyǵyn alǵan Prevo áleýmettik reformalardy qoldap, osal toptarǵa járdem kórsetýdi maqsat etken tulǵa retinde tanymal.
2023 jyldan bastap Vatikanda episkoptardy taǵaiyndaýǵa jaýapty mańyzdy qurylymdy basqarǵan ol búginde katolik áleminiń rýhani kóshbasshysy retinde tanylyp otyr.
Qazaqstan Prezidenti Qasym-Jomart Toqaev XIV Levti el halqynyń atynan quttyqtap, jedelhat joldady. Memleket basshysy Katolik shirkeýiniń beibitshilik pen turaqtylyqty nyǵaitýdaǵy rólin atap ótip, Qazaqstannyń dinaralyq kelisim men yntymaqtastyqty qoldai beretinin jetkizdi. Prezident sonymen qatar Rim Papasynyń elimizge eki márte saparmen kelgenin eske salyp, bul bailanystardyń erekshe mańyzyn atap ótti.
