Búgin, 2025 jyly 17 qańtarda Ulttyq bank bazalyq mólsherleme boiynsha kezekti sheshimin jariialady. Osy maqsatta ótken baspasóz máslihatynda Ulttyq bank tóraǵasy Timýr Súleimenov valiýta naryǵyndaǵy ahýalǵa qatysty Qaýipsizdik keńesiniń otyrysyn ótkizý týraly usynysqa qatysty túsinikteme berdi, dep jazady Dalanews.kz.
"Meniń oiymsha, bul másele bar mańyzdylyǵy turǵysynda prezident, ásirese Qaýipsizdik keńesi siiaqty alańda qarastyratyndai deńgeide emes. Qaýipsizdik keńesiniń qandai máselelerdi qaraitynyn anyqtaityn óz jarǵysy, erejesi bar. Meniń oiymsha, óz kúrdeliligi men dúdamaldyǵyna qaramastan atalǵan jaǵdai mundai deńgeide emes", – dedi Súleimenov Ulttyq bankte ótken brifingide.
Alaida, onyń aitýynsha, aqsha baǵamy máselesin ekonomikalyq saiasat máselesinen bólek qarastyrýǵa bolmaidy.
"Aqsha baǵamy - ekonomikanyń saýlyǵyn, jalpy memlekettik qarjy jaǵdaiyn kórsetetin "temperatýra". Bul - tek onyń bir kórinisi. Fýndamentaldy sebepterdi qarastyrmai, iaǵni nege bizde tólem balansy teris shyǵyp otyr, nege dollar boiynsha usynys árdaiym jetkiliksiz, nege bizde importqa suranys joǵary degendei. Mine, osy suraqtarǵa jaýap berý kerek. Sondyqtan ekonomikalyq saiasat máselelerin qarastyrýdy bylai ysyryp qoiyp, jeke-dara aqsha baǵamy saiasaty máselelerin qarastyrý nátije bermeidi", - dep atap ótti Súleimenov.
Buǵan deiin qarjyger-maman Rasýl Rysmambetov Ulttyq bankke "barlyq jumysty» jektep qoimai, strategiialyq sheshimder qabyldaý úshin Qaýipsizdik keńesiniń otyrysyn ótkizý qajet dep pikir bildirgen edi.
Aita ketsek, búgin bazalyq mólsherlemeni burynǵy deńgeiinde qaldyrǵan Ulttyq bank: "Aiyrbastaý baǵamynyń álsireýi, infliatsiialyq kútýlerdiń jedeldeýi, sondai-aq infliatsiianyń naqty dinamikasynyń ósýi aiasynda jiyntyq aqsha-kredit sharttary birshama jeńildedi. Osyǵan bailanysty negizgi makroekonomikalyq kórsetkishterdiń boljamy jańartylatyn kelesi sheshimde Komitet infliatsiiany 5%-dyq targetke qarai ornyqty túrde tómendeý traektoriiasyna qaitarý úshin aqsha-kredit saiasatyn qosymsha qatańdatý qajettiligin anyqtaidy" degen edi. Demek, Ulttyq bank 2025 jylǵy 7 naýryzdaǵy kezekti otyrysynda bazalyq mólsherlemeni kóterýi múmkin.
