بٷگٸن, 2025 جىلى 17 قاڭتاردا ۇلتتىق بانك بازالىق مٶلشەرلەمە بويىنشا كەزەكتٸ شەشٸمٸن جارييالادى. وسى ماقساتتا ٶتكەن باسپاسٶز مەسليحاتىندا ۇلتتىق بانك تٶراعاسى تيمۋر سٷلەيمەنوۆ ۆاليۋتا نارىعىنداعى احۋالعا قاتىستى قاۋٸپسٸزدٸك كەڭەسٸنٸڭ وتىرىسىن ٶتكٸزۋ تۋرالى ۇسىنىسقا قاتىستى تٷسٸنٸكتەمە بەردٸ, دەپ جازادى Dalanews.kz.
"مەنٸڭ ويىمشا, بۇل مەسەلە بار ماڭىزدىلىعى تۇرعىسىندا پرەزيدەنت, ەسٸرەسە قاۋٸپسٸزدٸك كەڭەسٸ سيياقتى الاڭدا قاراستىراتىنداي دەڭگەيدە ەمەس. قاۋٸپسٸزدٸك كەڭەسٸنٸڭ قانداي مەسەلەلەردٸ قارايتىنىن انىقتايتىن ٶز جارعىسى, ەرەجەسٸ بار. مەنٸڭ ويىمشا, ٶز كٷردەلٸلٸگٸ مەن دٷدامالدىعىنا قاراماستان اتالعان جاعداي مۇنداي دەڭگەيدە ەمەس", – دەدٸ سٷلەيمەنوۆ ۇلتتىق بانكتە ٶتكەن بريفينگٸدە.
الايدا, ونىڭ ايتۋىنشا, اقشا باعامى مەسەلەسٸن ەكونوميكالىق ساياسات مەسەلەسٸنەن بٶلەك قاراستىرۋعا بولمايدى.
"اقشا باعامى - ەكونوميكانىڭ ساۋلىعىن, جالپى مەملەكەتتٸك قارجى جاعدايىن كٶرسەتەتٸن "تەمپەراتۋرا". بۇل - تەك ونىڭ بٸر كٶرٸنٸسٸ. فۋندامەنتالدى سەبەپتەردٸ قاراستىرماي, ياعني نەگە بٸزدە تٶلەم بالانسى تەرٸس شىعىپ وتىر, نەگە دوللار بويىنشا ۇسىنىس ەردايىم جەتكٸلٸكسٸز, نەگە بٸزدە يمپورتقا سۇرانىس جوعارى دەگەندەي. مٸنە, وسى سۇراقتارعا جاۋاپ بەرۋ كەرەك. سوندىقتان ەكونوميكالىق ساياسات مەسەلەلەرٸن قاراستىرۋدى بىلاي ىسىرىپ قويىپ, جەكە-دارا اقشا باعامى ساياساتى مەسەلەلەرٸن قاراستىرۋ نەتيجە بەرمەيدٸ", - دەپ اتاپ ٶتتٸ سٷلەيمەنوۆ.
بۇعان دەيٸن قارجىگەر-مامان راسۋل رىسمامبەتوۆ ۇلتتىق بانككە "بارلىق جۇمىستى» جەكتەپ قويماي, ستراتەگييالىق شەشٸمدەر قابىلداۋ ٷشٸن قاۋٸپسٸزدٸك كەڭەسٸنٸڭ وتىرىسىن ٶتكٸزۋ قاجەت دەپ پٸكٸر بٸلدٸرگەن ەدٸ.
ايتا كەتسەك, بٷگٸن بازالىق مٶلشەرلەمەنٸ بۇرىنعى دەڭگەيٸندە قالدىرعان ۇلتتىق بانك: "ايىرباستاۋ باعامىنىڭ ەلسٸرەۋٸ, ينفلياتسييالىق كٷتۋلەردٸڭ جەدەلدەۋٸ, سونداي-اق ينفلياتسييانىڭ ناقتى ديناميكاسىنىڭ ٶسۋٸ اياسىندا جيىنتىق اقشا-كرەديت شارتتارى بٸرشاما جەڭٸلدەدٸ. وسىعان بايلانىستى نەگٸزگٸ ماكروەكونوميكالىق كٶرسەتكٸشتەردٸڭ بولجامى جاڭارتىلاتىن كەلەسٸ شەشٸمدە كوميتەت ينفلياتسييانى 5%-دىق تارگەتكە قاراي ورنىقتى تٷردە تٶمەندەۋ تراەكتوريياسىنا قايتارۋ ٷشٸن اقشا-كرەديت ساياساتىن قوسىمشا قاتاڭداتۋ قاجەتتٸلٸگٸن انىقتايدى" دەگەن ەدٸ. دەمەك, ۇلتتىق بانك 2025 جىلعى 7 ناۋرىزداعى كەزەكتٸ وتىرىسىندا بازالىق مٶلشەرلەمەنٸ كٶتەرۋٸ مٷمكٸن.
