Almaty oblysynyń Uiǵyr aýdanynda alǵashqy óńirlik Apricot Fest órik festivali ótti. Festival óńirdiń jazǵy týrizm kúntizbesindegi jarqyn oqiǵaǵa ainalyp, fermerler, qolónershiler, óńdeý ónerkásibi ókilderi, týrister men investorlardy bir alańda toǵystyrdy,- dep habarlaidy Dalanews.kz
Festivaldiń dál osy aýdanda ótýi zańdy qubylys. Uiǵyr aýdany búginde elimizdegi órik ósirýdiń jetekshi ortalyǵy sanalady. Aýdandaǵy 4 095 gektar baqtyń 3 100 gektaryn órik baýlary alyp jatyr. Jyl saiyn munda 22 myń tonnaǵa deiin ónim jinalyp, onyń 4 myń tonnasy Resei, Qyrǵyzstan jáne Ózbekstan naryǵyna eksporttalady. Qalǵan bóligi ishki naryqta suranysqa ie - óriktiń bir kelisi 250-300 teńge aralyǵynda satylady.
Festivaldiń resmi ashylýyna oblys, aýdan basshylyǵy, kásipkerler men qoǵam ókilderi qatysty.
"Apricot Fest - ekotýrizm men óńirlik ekonomikany damytýdyń tamasha mysaly. Bul - tabiǵat pen mádenietti, jergilikti ónim men biregeilikti toǵystyratyn alań. Bastapqy kezeńinde-aq joba sheteldik kásipkerlerdiń qyzyǵýshylyǵyn oiatyp otyr. Qyrǵyzstan men Ózbekstan kompaniialary festival aiasynda ónim jetkizý boiynsha kelisimder jasady", - deidi Almaty oblystyq máslihatynyń tóraǵasy Qýat Baiǵodjaev.
Uiǵyr aýdanynyń ákimi Bota Eleýsizova óriktiń óńir úshin erekshe simvoldyq máni bar ekenin atap ótti.
"Órik - bul bizdiń aýdannyń tek aýyl sharýashylyq ónimi ǵana emes, ekonomikamyzdyń, mádenietimizdiń de belgisi. Biz Apricot Fest festivalin jyl saiynǵy dástúrge ainaldyryp, óńirimizge týrister aǵynyn arttyrǵymyz keledi", - dedi ol.
Festival aiasynda túrli gastronomiialyq aimaqtar, jergilikti ónimder jármeńkesi, etno-shoýlar men sheberlik synyptary uiymdastyryldy. Biylǵy festivalde órik baýlary oqiǵalyq týrizmniń jańa nysandary retinde de kórsetildi.
"Aýyl jandandy. Kópten kútken qozǵalys, jańǵyrý bastaldy. Kelýshiler qyzyǵýshylyqpen tamashalap, ónimniń dámin kórip jatyr. Bizge dál osyndai sharalar qajet edi", - deidi jergilikti turǵyn Ravil Anadýllaev.
Almaty qalasynan kelgen qonaq Gúljan Toqtarhanova da óz áserimen bólisti.
"Biz otbasymyzben keldik. Atmosfera óte jyly, alýan túrli dámder men qyzyqty baǵdarlamalar kóp. Mundai festivalder óńirdiń bet-beinesin qalyptastyrady. Mindetti túrde taǵy kelemiz", — dedi ol.
2024 jyly Almaty oblysyndaǵy týristik aǵyn 20%-ǵa artqan. Óńir sheteldik týrister sany boiynsha el boiynsha úshinshi orynǵa shyqty. Týrizm salasyna 45 mlrd teńgeden astam jeke investitsiia tartylyp, 20 jańa joba júzege asyrylýda.
Týrister úshin búginde 40-tan astam tabiǵi nysan men 57 týristik marshrýt ashyq. Olardyń qatarynda Sharyn shatqaly, Kólsai jáne Qaiyńdy kólderi, ulttyq parkter, vizit-ortalyqtar bar. Tek eki ulttyq parktiń infraqurylymyn damytýǵa 2024 jyly 170 mln teńge baǵyttalǵan.
Almaty oblysynyń tusaýkeserleri BBC, TripAdvisor, Qytai men Ońtústik Koreia platformalarynda belsendi túrde ilgeriletilýde. Óńir iri halyqaralyq jobalar men festivalderge alań bolyp otyr — Tengri Ultra, Oceanman Kazakhstan, Qonaevtaǵy áýe sharlary festivali, «Uly dala joryǵy» ekspeditsiiasy sonyń dáleli.
Almaty oblysynyń týrizm basqarmasynyń basshysy Qýanyshbek Mirambekulynyń aitýynsha, 2026 jyldanbastap Apricot Fest festivalin sáýir aiynda, órik baýlary gúldenetin kezeńde ótkizý josparlanyp otyr.
"Kóktem - óńirimizdiń eń ádemi kezeńi. Órik gúldegende baýlar kózdiń jaýyn alady. Biz sáýirdegi festivalge týrister aǵyny odan saiyn kóbeiedi dep senemiz", - dedi ol.
Alǵashqy Apricot Fest festivali tek ónim merekesi ǵana emes, jańa týristik jáne investitsiialyq baǵyt qalyptastyrýdyń bastaýyna ainaldy. Endi órik - eksporttyq ónim ǵana emes, óńirdiń simvolyna, qonaqjailyǵy men múmkindikteriniń kórsetkishine ainalýda.
Almaty oblysy turaqty týrizm men aýyl sharýashylyǵyn damytýdaǵy zor áleýetin dáleldep, yntymaqtastyq pen ósýdiń jańa kókjiekterin ashyp keledi.
