18 maýsymda Aqordada ótken jiynda Memleket basshysy Qasym-Jomart Toqaev "Astana meditsina ýniversitetine" ulttyq mártebe beriletinin aitty, dep habarlaidy dalanews.kz.
Prezidenttiń sózinshe, bul joǵary oqý orny elimizdegi jetekshi meditsinalyq bilim berý mekemeleriniń biri retinde tanylǵan. Ýniversitet búginde tsifrlyq densaýlyq saqtaý men biomeditsina baǵyttaryn tabysty damytyp keledi.
"Mańdaialdy otandyq joǵary mektepterdiń biri retinde tanylǵan "Astana meditsina ýniversiteti’"tsifrlyq densaýlyq saqtaý men biomeditsinany tabysty damytyp keledi. Úkimet atalǵan oqý ornynyń aiqyn jetistikterin eskerip, ol eń joǵary – Ulttyq ýniversitet mártebesin alýǵa ábden laiyq dep sanaidy. Bul usynysty qoldaimyn", – dedi Toqaev.
Sonymen qatar Memleket basshysy ýniversitetke belgili ǵalym, otandyq taǵamtaný ǵylymy men profilaktikalyq meditsinanyń negizin qalaýshy, Qazaqstannyń Eńbek Eri Tóregeldi Sharmanovtyń esimin berýdi usyndy.
Budan bólek, Qaraǵandy meditsina ýniversitetine osy oqý ornynyń negizin qalaǵan ári ony uzaq jyl basqarǵan Petr Moiseevich Pospelovtiń aty beriletini aityldy. Biyl atalǵan ýniversitettiń qurylǵanyna 125 jyl tolyp otyr.
Aita keteiik, Tóregeldi Sharmanov – búkil ǵumyryn otandyq meditsinany damytýǵa arnaǵan belgili nýtritsiolog. Ol 12 jyl boiy Densaýlyq saqtaý ministrligin basqarǵan. 1974 jyldan bastap Qazaq taǵamtaný akademiiasyna jetekshilik etti.
Sharmanov Dúniejúzilik densaýlyq saqtaý uiymynyń eń joǵary dárejeli erekshelik belgisi sanalatyn Leon Bernard syilyǵymen jáne basqa da kóptegen marapattarmen nagradtalǵan. Bul onyń meditsina salasyndaǵy eńbeginiń halyqaralyq deńgeide moiyndalǵanyn kórsetedi.
