Sherzat Bolattyń ákesi Qarjaýbai Nurymovtyń qaryndasy Perizat úidiń órtenýine qatysty pikir bildirdi, dep habarlaidy Dalanews.kz Ulysmediaǵa siltep.
Marqumnyń týǵan-týystarynyń aitýynsha, órt shamamen túngi 00.30 ýaqytynda bolǵan. Úide eshkim bolmaǵan. Sebebi Sherzat ata-ájesiniń qolynda óskendikten, bul jaǵdai egde kisilerge qatty aýyr tigendikten, marqumnyń týǵan-týystary qara shańyraqta bolǵan. Úidegi mal aman, tek itti kúiik shalǵan.
Oqiǵa jaily Qarjaýbai Nurymovtyń qaryndasy aityp berdi. “Qarjaýbaidyń ózi birdeńe deitindei jaǵdaida emes” deidi ol. Ulynyń qazasyna qabyrǵasy sógilip otyrǵan ákege bul oqiǵa ekinshi soqqy bolyp, eseńgirep qalǵan. Marqumnyń týǵan-týystary órtti kúdiktiler jaqtan kelgen áreketpen bailanystyrady. Ony Perizet aityp berdi. “Úidiń órtenýin aldyńǵy bolǵan jaǵdailarmen bailanystyryp otyrsyz ba?” degen suraqqa “árine, bailanystyramyz” deidi.
– Sońǵy úsh kúnde Sherzattyń synyptastary “kóshelerińizde nómiri joq kólikter júr” dedi. Órt bolmai bir kún buryn kórshiler “sizdiń úilerińizge nómiri joq kólikpen kelgender kirip shyqty, biz shýlap, bárimiz jaryqty jaqtyq, aiǵailap edik, toqtamastan qashyp ketti” dep habar berdi. Mektep balalarynyń bári de bir aýyldan bolǵan soń kimniń qandai kólikti aidaitynyn bilemiz dep otyr. Balalar “ishindegi adamdar da beitanys, amandasaiyq dep qasyna baryp edik, terezeni jaýyp alyp, toqtamai ótip ketti” dedi. Sońǵy úsh kúnde “kólikter júr” degendi estidik. IIM-ge baryp, kelgennen beri osylai bolyp jatyr, – deidi ol.
Perizat Nurymova resmi organdar óz jumysyn durys atqarmady dep esepteitinin jetkizdi.
– Qarastyryp jatyr. Sonyń “arqasy”. IIM-niń, Talǵar, oblys ákimdiginiń “qarastyryp, kúshti jumys atqaryp jatqandarynyń arqasy”. Úiden aiyrylyp qaldyq. Úidi qoishy, janymyz aman. Buǵan deiin kúzet qoiylǵan joq. Úige qoimai-aq qoisyn, joq degende aýyldyń basyna qoiyp bersin. Kimniń kirip shyǵyp jatqanyn bilsin. Qarapaiym halyq bolyp, joldan ótken kólikti toqtatyp, “kimsiń” dep surai bersek, esi durys emes dep oilaidy ǵoi. Ustalǵan adamdardyń, sol jaqtan shyqqan adamdardyń bárine kólik qoiyp berip qoiypty. Aýylǵa kire beriste kólik qoiypty. Sonda biz janymyz shyǵyp otyrǵanda bireýdiń janyn alýǵa shamamyz jete me? Mamamyzdyń ózi bir qulap, bir esin jiyp otyr. Zań ókilderine oilanýǵa bolady ǵoi. Búgin topyrlap bári júr. Júrgennen ne paida? Bári bitken soń! Qalǵanymyzdyń janymyzdy alyp ketkenin kútemiz be? Sóitip, bir tóbe bolyp, úiip qoiaiyn degen shyǵar? Zań ókilderi jumys istese bulai bolmaidy! Bizdiń prezident Qasym-Jomart Kemeluly zań ókilderi qalai jumys isteitinin kórsin! Sol kisiniń qol astynda basshy bolyp, jumysshylarynyń is-áreketi osy! – deidi ol.
Aita keteiik, 12 qazanǵa qaraǵan túni Talǵar tragediiasynda qaza tapqan Sherzat Bolattyń úii órtenip ketti. Bul týraly áleýmettik jelide habarlana bastady.
Bul derekke Politsiia departamenti jaýap berdi. 12 qazanǵa qaraǵan túni Eńbekshiqazaq aýdany Azat aýylyndaǵy úilerdiń birinde órt boldy.
Bótenniń múlkin qasaqana joiý deregi boiynsha politsiia qylmystyq is qozǵady.
Tergeý aiasynda kýágerlerden jaýap alynyp jatyr, sondai-aq beinebaqylaý kameralarynyń jazbalary zerttelip jatyr.
