Meniń qolymdaǵy nanǵa ashqaraqtana qarap jutynǵandaı boldy... Toqashymnan bir úzip alyp ıtke tastadym. Sońymnan biraz júrdi de, mende endi nannyń joqtyǵyn sezdi bilem, kúderin úzip qala berdi. Kelesi kúni, qaıtar jolymda keshegi ıt taǵy da tap boldy.
Men kútip júrgen tárizdi. Inelikteı qatyp ábden aryp júdegen sońymnan qalmaı úıge erip keldi. Júgirip úıge kirip, tamaq qaladyqtaryn alyp shyqtym. It meni kórip, sońymnan erdi.
Qoraǵa aparyp ákelgen tamaqty ıtaıaqqa quıyp berip jatqanda apam:
– Myna ıtti sen be, ákep júrgen? – dedi.
– Ózi erip keldi. Ash eken. Tamaq berdim. Apa, tımeıikshi, júre bersin.
– Júrse, júre bersin. Ne iship-jep qıratar deısiń.
Arada kóp kúnder jyljyp ótti. It bizdiń úıge sińip ketti. Osylaısha Aqtós bizdiń úıdiń bir múshesine aınaldy. Sol Aqtós bir-eki kúnnen beri kózge túspeı qoıdy. «Bul qaıda júr?» dep, mańaıdan kórinbegen soń, qoraǵa izdep kirdim. Qoranyń túkpirinen túsiniksiz dybys shyqty. Neniń dybysy boldy eken dep aıaǵymdy jáılap basyp, qýysqa qaraǵanymda, ıtimizdiń kúshiktegen eken.
Enesiniń baýyrynda jatqan kúshikter ara-tura qyńsylap qoıady. It kúshiktegen soń, apam jaqtyrmaı júrdi. Apam aýylymyzdaǵy sút óńdeıtin fermada jumys isteıtin. Birde jumystan renjip oraldy.
Mundaı jaǵdaıda biz úndemeı, tym-tyrys otyryp, apamnyń qas-qabaǵyna qaraıtynbyz. Búgin de sóıttik. Apam maǵan óńin sýyta qarap:
– Itterine tamaqty qaıdan taýyp beremin. Ana kúshikterdiń kózin qurt, búginnen qaldyrma, – dedi. Bul kezde kúshikter baýyryn kóterip, eseıip qalǵan edi.
Kókemniń joqtyǵy esime tústi. Úıde menen basqa bir inim, eki qaryndasym bar bolatyn. Bir kúshikti enesimen qaldyryp, qalǵandaryn qapqa salyp, syrtqa shyqtym. Mashınalar tynymsyz ersili-qarsyly ótip jatqan qara joldan ótip, qırǵan eski úıge keldim. Onyń mańynda oınap júrip, qamba baryn kórgenmin.
Kúshikterdi qambaǵa tastap, qara joldan ótip ketsem de, qysylaǵan aıanyshty daýystary ap-anyq estilip turdy. Mashınalar ótken kezde dybystary basylǵandaı bolady da, ótip ketkennen keıin qaıtadan estiledi. Dátim shydamaı artyma qaraılaı beremin. İlgeri basqan aıaǵym keri ketedi. Ne isterimdi bilmedim.
Aqyry kúshikterdi qımaı, qaıta bardym. Qambaga túsip, kúshikterdi qapqa sala bastadym. «Shirkin, kókem bolsa ǵoı. Men senderdi munda ákelmegen bolar edim!» deımin ishimnen.
Kózime kelgen jasty tyıa alsamshy. Men úıge qaraı jylap kelemin, arqamdaǵy kúshikter qynsylap keledi.
