Ustazdyq barlyq mamandyqtyń uly bastamasy. Qandai maman bolmasyn eń aldymen ustazdan bilim alady. «Adamnyń adamshylyǵy jaqsy ustazdan bolady» dep qazaqtyń bas aqyny Abai Qunanbaev aitqandai, qai zamanda bolmasyn ustazdy erekshe qurmettegen. Erlan Aitahanov óz sózinde:
– Qurmetti ustazdar! Sizderdi búgingi jarqyn da qýanyshty, aitýly mereke –Muǵalimder kúnimen quttyqtaimyn! Elbasymyz N.Á.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Qazaqstan Halqyna arnaǵan Joldaýynda kelesi jyly «Pedagog mártebesi týraly» zańdy ázirlep, qabyldaý qajet ekenin tilge tiek etip, muǵalimder men mektepke deiingi mekemeler qyzmetkerleri úshin barlyq igilikti qarastyrý kerektigin basa aitqan bolatyn. Ustaz – keler kúnniń ustasy. Urpaǵymyzdyń erteń qandai adam bolyp ósetini – muǵalimderdiń búgingi eńbeginiń jemisi bolmaq. Uly aǵartýshy Ahmet Baitursynovtyń «Ustaz úzdiksiz izdengende ǵana, shákirt janyna nur quia alady», – degen sózi izdenimpaz, jańasha ustazdarǵa arnalǵandai. Muny árbir muǵalim jadynda saqtaýy tiis. Táýelsiz qazaq eliniń damýyna qosyp kele jatqan eńbekterińiz úshin, men barshańyzǵa sheksiz alǵysymdy bildiremin, – dedi.
Munan soń aýdan basshysy jaqynda ǵana oblystyq «Ońtústik Qazaqstan» gazetiniń uiymdastyrýymen Túrkistan qalasynda ótken «Jaqsylar, dastan aitaiyn... » atty jas jyrshylar baiqaýyna eki birdei shákirtin úkilep qosyp, baiqaýdyń bas júldesin jeńip alǵan M.Áýezov atyndaǵy jalpy orta mektebiniń muǵalimi Ainur Álsherge shynaiy rizashlyǵyn bildirip, alǵys hatpen marapattady. Marapattaý barysynda aýdan ákimi óz eńbeginiń jemisin kórip, avtokólik iesi atanǵan Ainurdyń bul jeńisi basqa ustazdardyń da jumysqa degen yntasyn oiatyp, jigerlendiretinin aityp, aldaǵy jumystaryna sáttilik tiledi.
Jiynda bilim salasynyń úzdikteri Túrkistan oblysy ákimi men aýdan ákiminiń «Alǵys hattarymen», Bilim jáne ǵylym ministrligi men oblystyq bilim basqarmasynyń qurmet gramotalarymen marapattaldy.
Jiyn barysynda aýdandyq máslihat hatshysy Myrzahan Manapov pen aýdandyq bilim qyzmetkerleri kásipodaq uiymynyń tóraǵasy Qasym Egemberdi sóz alyp, zamanyna sai bilimdi urpaqtyń bolashaǵyn qalyptastyrýshy maman ieleri ulaǵatty ustazdar qaýymyn merekelerimen quttyqtap, oblystyq máslihat pen kásipodaq uiymynyń qurmet gramotalary men tósbelgilerin tabystasa, aýdandyq qoǵamdyq keńesiniń tóraǵasy Myrzahmet Temirbekov ulaǵatty jandarǵa aqjarma tilegin jetkizdi.
Odan ári merekelik shara kontserttik baǵdarlamaǵa ulasyp, aýdannyń ónerli jas oqýshylary ustazdarǵa arnalǵan ánderdi naqyshyna keltire oryndasa, bishiler ózderiniń balaýsa tátti qylyqtarymen kóptiń kóńilin jaýlady. Keshte aitylǵan aqjarma tilekter men júrek tebirenter ásem ánder muǵalimderge merekelik kóńil-kúi syilap, erekshe áserge bóledi.
