Bul, árine, bizdiń kókeiimizdegi kópten jaýabyn tappai júrgen saýaldyń oń sheshimin tabýyna jol bastap, ustazdar qaýymyna úmit syilaǵany sózsiz. Sebebi, bul másele damyǵan Batys elderinde burynnan sheshimin tapqan. Ol elderde muǵalim jumysy men onyń quqyqtary zań aiasynda qorǵalady. Máselen, Gretsiia, Daniia, Italiia, Germaniia, AQSh, Portýgaliia jáne Kanada syndy memleketterde muǵalimder memlekettik qyzmetshi bolyp sanalady. Al kórshiles Reseide bul másele baiaǵyda-aq sheshimin taýyp, onda federaldyq Zańǵa sáikes, muǵalimder 25 jyldyq eńbek ótiline qarai jeńildikpen zeinetke shyǵý múmkindigine ie. «Pedagog mártebesi týraly» Zań kúni keshe bizdiń elimizde de qabyldandy. Atalǵan Zańǵa sáikes muǵalimder kásibi qyzmetinen tys qosymsha jumystardan arylady jáne istegen jumysyna sai jalaqy tólenetin bolady. Bul zań muǵalimderdiń quqyǵynyń taptalmaýyna jáne olardyń óz kásibine jatpaityn qoǵamdyq jumystarǵa tartylmaýyna kepil bolady. Iaǵni materialdy jáne materialdy emes yntalandyrý, áleýmettik kepildikter, ustazdardyń quqyqtaryn keńeitý, muǵalimniń júktemesin azaitý syndy ózekti máselelerdi qamtidy.
Muǵalimderdiń dástúrli tamyz konferentsiiasyna Memleket basshysy Qasym-Jomart Toqaevtyń qatysýy ustazdarymyzǵa degen qurmettiń bastaýy boldy desek, keshe ǵana kúshine engen «Pedagog mártebesi týraly» Zań endi eńbegi elenbei kelgen ustazdar qaýymynyń mereiin asqaqtatqany sózsiz.
Jasyratyny joq, alǵashqy jyldary mardymsyz jalaqymen eleýsiz qalǵan keibir bilikti ustazdarymyz kúnkóris qamymen basqa salaǵa ketse, mektep bitirgen jastarymyz pedagog mamandyǵyna qyzyǵýshylyq tanytpai, keiin jalaqysy durys bolatyn ózge jumystardy tańdap jatty. Osy olqylyqtar elimizdiń mektepterindegi bilim sapasynyń tómendeýi men pedagog kadrlarynyń jetispeýine ákelip soqtyrdy. Osy jaittardyń aldyn alý, birinshiden, ustaz mártebesin qaitarý elimizdiń eń ózekti máselesiniń birine ainalǵan bolatyn. Olai deitinimiz, biz taiaý jyldary álemniń damyǵan eń ozyq 30 eliniń qataryna kirý jolynda jumystar jasap jatyrmyz. Bizge bul atalǵan mindetke qol jetkizý úshin eń aldymen bilim nárimen jan-jaqty qarýlanǵan jastarymyzdyń qatary kóp bolǵany abzal. Al bul jastardyń kóp bolýy úshin eń aldymen sapaly bilim beretin pedagog kadrlarymyzǵa erekshe qoldaý kórsetkenimiz durys. Biz sonda ǵana bul mindetterdi oidaǵydai oryndai alatynymyz aitpasa da túsinikti. Búgingi qoldanysqa engen Zańymyz bul máselege naqty qoldaý bolady dep aitýymyzǵa tolyq negiz bar.
Osy oraida, búginde elimizdegi pedagogikalyq kadrlar daiarlaityn joǵary oqý oryndarynyń ustahanasyna ainalyp otyrǵan Abai atyndaǵy Qazaq ulttyq pedagogikalyq ýniversitetine de artylar jaýapkershiliktiń jeńil bolmasy anyq. Sebebi Zańmen bekitilgen «Ustaz mártebesine» laiyq bolar tulǵalardyń basym kópshiligin bizdiń ýniversitetimiz daiarlap shyǵarady.
Bizdiń ýniversitetimizdiń rektory Takir Ospanuly Balyqbaev alǵashqy kelgen kúnnen bastap ustaz ben stýdenttiń jaýapkershiligin arttyrý maqsatynda «Akademiialyq adaldyq» kodeksin qabyldady. Bul degenimiz, ýniversitetimizdiń stýdentterin tek qana óz kúshimen ǵana jetistikke jete alatyn myqty kadr etip daiarlaý bolyp tabylady. Eger bizdiń stýdentterimiz joǵaryda atap ótkendei, sabaq barysynda ózine artylǵan jaýapkershilikti sezinip, bilim men ǵylymnyń belesine tek óz kúshimen ǵana umtylar bolsa onda erteń Zańmen qorǵalyp jatqan «Pedagog mártebesine» laiyq tulǵa bolary sózsiz. Osy atalǵan «Akademiialyq adaldyq» kodeksine sáikes biz stýdentterimizge qoiylatyn talaptar men mindetterdi kúsheite otyryp, olardyń sapaly bilim alýyna, kásibi bilimdi tereń meńgerýine, oqytýshylarymyzdyń óz jumystaryn adal atqarýyna múddelimiz.
Sonymen qatar biz rektordyń usynysymen stýdentterdiń oqý úlgerimin baǵalaý kriterilerin de jańasha mazmunda qarastyryp, jańa zamanǵa sai bilim mazmunyn da jańartýdamyz.
Hairýlla Janbekov, Abai atyndaǵy Qazaq ulttyq pedagogikalyq ýniversiteti Akademiialyq máseleler jónindegi departament direktory
