15 mamyr – Halyqaralyq otbasy kúnine orai Qaraǵandy qalasyndaǵy Qazaqstan Respýblikasy Ulttyq ulanynyń áskeri bólimderinde qyzmet atqaryp júrgen áskeri otbasylar jaiynda erekshe atap ótýge bolady, dep habarlaidy dalanews.kz.
Búginde óńirdegi áskeri bólimderde 20-dan astam otbasy Otan aldyndaǵy boryshyn birge atqaryp keledi. Olar tek qyzmette ǵana emes, ómirde de bir-birine tirek bolyp, áskeri ortadaǵy otbasy qundylyqtarynyń jarqyn úlgisin kórsetýde.
Solardyń biri – Qazaqstan Respýblikasynyń Ulttyq ulany quramyndaǵy 5451 áskeri bóliminde qyzmet atqaryp júrgen Taýbaevtar otbasy. Erli-zaiyptylar áskeri qyzmettiń jaýapkershiligin tereń túsinip, el qaýipsizdigin qamtamasyz etý jolynda birge eńbek etip keledi. Olardyń otbasy áskeri tártip pen ózara syilastyqtyń, qoldaý men senimniń simvolyna ainalǵan.
Sonymen qatar áskeri ortada ózderiniń úlgili qyzmetimen erekshelenip júrgen Golovkolar otbasy men Atantaevtar otbasy da áriptesteri arasynda úlken qurmetke ie. Olar kúndelikti qyzmet barysynda kásibilik pen tabandylyq tanytyp qana qoimai, jas áskeri qyzmetshilerge ónege bolyp keledi.
Áskeri qyzmet – úlken jaýapkershilik pen tózimdi talap etetin sala. Al bul jolda otbasynyń qoldaýy erekshe mańyzǵa ie. Sondyqtan áskeri otbasylar – el tynyshtyǵy men qaýipsizdiginiń kórinbeitin, biraq asa mańyzdy tiregi.
Halyqaralyq otbasy kúni – otbasy qundylyǵyn dáriptep, birlik pen syilastyqty nyǵaitatyn mereke. Osyndai mereili kúnde áskeri qyzmetti birge atqaryp júrgen otbasylarǵa alǵys bildirý – úlken qurmet.
