بۇل، ارينە، ءبىزدىڭ كوكەيىمىزدەگى كوپتەن جاۋابىن تاپپاي جۇرگەن ساۋالدىڭ وڭ شەشىمىن تابۋىنا جول باستاپ، ۇستازدار قاۋىمىنا ءۇمىت سىيلاعانى ءسوزسىز. سەبەبى، بۇل ماسەلە دامىعان باتىس ەلدەرىندە بۇرىننان شەشىمىن تاپقان. ول ەلدەردە ءمۇعالىم جۇمىسى مەن ونىڭ قۇقىقتارى زاڭ اياسىندا قورعالادى. ماسەلەن، گرەسيا، دانيا، يتاليا، گەرمانيا، اقش، پورتۋگاليا جانە كانادا سىندى مەملەكەتتەردە مۇعالىمدەر مەملەكەتتىك قىزمەتشى بولىپ سانالادى. ال كورشىلەس رەسەيدە بۇل ماسەلە باياعىدا-اق شەشىمىن تاۋىپ، وندا فەدەرالدىق زاڭعا سايكەس، مۇعالىمدەر 25 جىلدىق ەڭبەك وتىلىنە قاراي جەڭىلدىكپەن زەينەتكە شىعۋ مۇمكىندىگىنە يە. «پەداگوگ مارتەبەسى تۋرالى» زاڭ كۇنى كەشە ءبىزدىڭ ەلىمىزدە دە قابىلداندى. اتالعان زاڭعا سايكەس مۇعالىمدەر كاسىبي قىزمەتىنەن تىس قوسىمشا جۇمىستاردان ارىلادى جانە ىستەگەن جۇمىسىنا ساي جالاقى تولەنەتىن بولادى. بۇل زاڭ مۇعالىمدەردىڭ قۇقىعىنىڭ تاپتالماۋىنا جانە ولاردىڭ ءوز كاسىبىنە جاتپايتىن قوعامدىق جۇمىستارعا تارتىلماۋىنا كەپىل بولادى. ياعني ماتەريالدى جانە ماتەريالدى ەمەس ىنتالاندىرۋ، الەۋمەتتىك كەپىلدىكتەر، ۇستازداردىڭ قۇقىقتارىن كەڭەيتۋ، ءمۇعالىمنىڭ جۇكتەمەسىن ازايتۋ سىندى وزەكتى ماسەلەلەردى قامتيدى.
مۇعالىمدەردىڭ ءداستۇرلى تامىز كونفەرەنسياسىنا مەملەكەت باسشىسى قاسىم-جومارت توقايەۆتىڭ قاتىسۋى ۇستازدارىمىزعا دەگەن قۇرمەتتىڭ باستاۋى بولدى دەسەك، كەشە عانا كۇشىنە ەنگەن «پەداگوگ مارتەبەسى تۋرالى» زاڭ ەندى ەڭبەگى ەلەنبەي كەلگەن ۇستازدار قاۋىمىنىڭ مەرەيىن اسقاقتاتقانى ءسوزسىز.
جاسىراتىنى جوق، العاشقى جىلدارى ماردىمسىز جالاقىمەن ەلەۋسىز قالعان كەيبىر بىلىكتى ۇستازدارىمىز كۇنكورىس قامىمەن باسقا سالاعا كەتسە، مەكتەپ بىتىرگەن جاستارىمىز پەداگوگ ماماندىعىنا قىزىعۋشىلىق تانىتپاي، كەيىن جالاقىسى دۇرىس بولاتىن وزگە جۇمىستاردى تاڭداپ جاتتى. وسى ولقىلىقتار ەلىمىزدىڭ مەكتەپتەرىندەگى ءبىلىم ساپاسىنىڭ تومەندەۋى مەن پەداگوگ كادرلارىنىڭ جەتىسپەۋىنە اكەلىپ سوقتىردى. وسى جايتتاردىڭ الدىن الۋ، بىرىنشىدەن، ۇستاز مارتەبەسىن قايتارۋ ەلىمىزدىڭ ەڭ وزەكتى ماسەلەسىنىڭ بىرىنە اينالعان بولاتىن. ولاي دەيتىنىمىز، ءبىز تاياۋ جىلدارى الەمنىڭ دامىعان ەڭ وزىق 30 ەلىنىڭ قاتارىنا كىرۋ جولىندا جۇمىستار جاساپ جاتىرمىز. بىزگە بۇل اتالعان مىندەتكە قول جەتكىزۋ ءۇشىن ەڭ الدىمەن ءبىلىم نارىمەن جان-جاقتى قارۋلانعان جاستارىمىزدىڭ قاتارى كوپ بولعانى ابزال. ال بۇل جاستاردىڭ كوپ بولۋى ءۇشىن ەڭ الدىمەن ساپالى ءبىلىم بەرەتىن پەداگوگ كادرلارىمىزعا ەرەكشە قولداۋ كورسەتكەنىمىز دۇرىس. ءبىز سوندا عانا بۇل مىندەتتەردى ويداعىداي ورىنداي الاتىنىمىز ايتپاسا دا تۇسىنىكتى. بۇگىنگى قولدانىسقا ەنگەن زاڭىمىز بۇل ماسەلەگە ناقتى قولداۋ بولادى دەپ ايتۋىمىزعا تولىق نەگىز بار.
وسى ورايدا، بۇگىندە ەلىمىزدەگى پەداگوگيكالىق كادرلار دايارلايتىن جوعارى وقۋ ورىندارىنىڭ ۇستاحاناسىنا اينالىپ وتىرعان اباي اتىنداعى قازاق ۇلتتىق پەداگوگيكالىق ۋنيۆەرسيتەتىنە دە ارتىلار جاۋاپكەرشىلىكتىڭ جەڭىل بولماسى انىق. سەبەبى زاڭمەن بەكىتىلگەن «ۇستاز مارتەبەسىنە» لايىق بولار تۇلعالاردىڭ باسىم كوپشىلىگىن ءبىزدىڭ ۋنيۆەرسيتەتىمىز دايارلاپ شىعارادى.
ءبىزدىڭ ۋنيۆەرسيتەتىمىزدىڭ رەكتورى تاكير وسپان ۇلى بالىقبايەۆ العاشقى كەلگەن كۇننەن باستاپ ۇستاز بەن ستۋدەنتتىڭ جاۋاپكەرشىلىگىن ارتتىرۋ ماقساتىندا «اكادەميالىق ادالدىق» كودەكسىن قابىلدادى. بۇل دەگەنىمىز، ۋنيۆەرسيتەتىمىزدىڭ ستۋدەنتتەرىن تەك قانا ءوز كۇشىمەن عانا جەتىستىككە جەتە الاتىن مىقتى كادر ەتىپ دايارلاۋ بولىپ تابىلادى. ەگەر ءبىزدىڭ ستۋدەنتتەرىمىز جوعارىدا اتاپ وتكەندەي، ساباق بارىسىندا وزىنە ارتىلعان جاۋاپكەرشىلىكتى سەزىنىپ، ءبىلىم مەن عىلىمنىڭ بەلەسىنە تەك ءوز كۇشىمەن عانا ۇمتىلار بولسا وندا ەرتەڭ زاڭمەن قورعالىپ جاتقان «پەداگوگ مارتەبەسىنە» لايىق تۇلعا بولارى ءسوزسىز. وسى اتالعان «اكادەميالىق ادالدىق» كودەكسىنە سايكەس ءبىز ستۋدەنتتەرىمىزگە قويىلاتىن تالاپتار مەن مىندەتتەردى كۇشەيتە وتىرىپ، ولاردىڭ ساپالى ءبىلىم الۋىنا، كاسىبي ءبىلىمدى تەرەڭ مەڭگەرۋىنە، وقىتۋشىلارىمىزدىڭ ءوز جۇمىستارىن ادال اتقارۋىنا مۇددەلىمىز.
سونىمەن قاتار ءبىز رەكتوردىڭ ۇسىنىسىمەن ستۋدەنتتەردىڭ وقۋ ۇلگەرىمىن باعالاۋ كريتەريلەرىن دە جاڭاشا مازمۇندا قاراستىرىپ، جاڭا زامانعا ساي ءبىلىم مازمۇنىن دا جاڭارتۋدامىز.
بۇگىنگىدەي كوز ىلەسپەس جىلدامدىقتا تەز وزگەرىپ جاتقان زاماندا مەملەكەتىمىزدىڭ ۇستازدار قاۋىمىنا جاساعان بۇل قامقورلىعى الدىڭعى قاتارلى وزىق ەلدەردىڭ قاتارىنا ءبىر قادام جاقىنداۋعا مۇمكىندىك تۋعىزارى حاق.
حايرۋللا جانبەكوۆ، اباي اتىنداعى قازاق ۇلتتىق پەداگوگيكالىق ۋنيۆەرسيتەتى اكادەميالىق ماسەلەلەر جونىندەگى دەپارتامەنت ديرەكتورى
