Úkimettegi brifing barysynda Oljas Bektenovke Nursultan Nazarbaev pen onyń otbasyna qatysty suraq qoiyldy. Onda da aktivterdi qaitarý boiynsha, dep habarlaidy Dalanews.kz.
Úkimettegi brifing barysynda bul saýaldy LS basylymynyń tilshisi alǵa tartty:
"Bilesiz be, qańtar oqiǵasynan keiin "Halyq únine qulaq asatyn memleket, Ádiletti Qazaqstan quramyz. Biýdjet aqshasynan eski Qazaqstan ókilderi aiaǵyn tartatyn bolady, urlanǵan-jyrlanǵan aktivterdi qaitaramyz" degen sekildi urandar boldy. Biraq, kórip otyrǵanymyzdai, Nazarbaevtar otbasy elimizde burynǵydai emin-erkin júr, biznesterin dóńgeletip jatyr, aktivteri óz janynda, olarǵa kiligip jatqan eshkim joq. Siz ózińiz ótkende Antikor basshysy boldyńyz, qazir Úkimet basyndasyz. Qalai oilaisyz, zańsyz aktivterdi keri qaitarý jumysy sátti júzege asyrylyp jatyr ma? Nazarbaevtyń otbasynan qandai da bir aktivtiń qaitarylǵan kezi boldy ma? Bizdińshe, bul jumystyń barlyǵy tek upai jinaý sekildi ǵana kórinedi. Óitkeni bizdiń kórip otyrǵanymyz maida-shúide korrýptsionerler, al irileri qaida?"
Bul saýalǵa jaýap bere otyryp, Oljas Bektenov bul arada qandai da bir upaiǵa jumys isteý degen joq ekenin kesip aitty.
"Bul baǵytta úlken júieli jumystar atqarylyp jatyr. Ózderińiz jaqsy bilesizder, tuńǵysh Prezidenttiń otbasy ókilderine qatysty, tipti qylmystyq ister de qozǵalǵanyn. Barlyǵy zań sheńberinde júrgizilýi shart. Al bul jumystar júrgizilip jatyr. Qaitarylǵan 900 mlrd teńgeden asa, iaǵni shamamen 1 trln teńgeni "maida-shúide" deseńiz, óz erkińiz. Biraq, ázirge bizdiń qol jetkize alǵanymyz osy soma. Jalpy, bul bir kúnde bitetin sharýa emes qoi, ol óz jalǵasyn tabýda. Ádiletti Qazaqstandy qurý turǵysyna keletin bolsaq, árine 2022 jyldan keiin bul baǵytta aitarlyqtai alǵa jyljýlar boldy".
Biraq bul jaýapqa qanaǵattanbaǵan jýrnalist suraǵyn bylai naqtylai tústi:
"Nazarbaevtar otbasy degende birneshe mlrd teńge tólep, qysqa merzimde túrmeden shyǵyp ketken ol kisiniń týysy týraly aityp otyrsyz ba? Men naqty Nazarbaevtyń óz otbasyna qatysty suraq qoiyp otyrmyn. Álde osy júrgizilgen ister jetkilikti dep sanaisyz ba?".
Buǵan premer qysqa jaýap qaiyrdy:
"Jetkilikti me, jetkiliksiz be, bul - baǵamdaý kategoriiasyna jatatyn nárse. Bar aitarym – bul baǵytta jumystar óz jalǵastyǵyn tabady".
