Premer-ministrdiń orynbasary Serik Jumanǵarin Úshqońyrda 15 myń gektar jerdi qarýly kúzet qorshap alǵany týraly aqparatqa jaýap berdi, - dep habarlaidy Dalanews.kz.
Májilis depýtaty Maqsat Tolyqbai Almaty oblysyn Shamalǵan aýylyndaǵy Úshqońyr taýy qorshalyp, ol jerge kire almaǵanyn aitqan bolatyn. Onyń aitýynsha, memlekettiń 15 myń gektar jerin qarýlanyp alǵan kúzetshiler qorshap alǵan.
"Tabiǵaty keremet jer. Bul jerde joldy jaýyp, qorshap tastaǵan. Qarýly adamdardy qoiyp tastaǵan. Eshkimdi ótkizbeidi. El ózderiniń jaiylym jerine bara almai otyr. Memlekettik aktileri barlar da kire almai otyr. Men kirýim múmkin, basqalardy kirgizbeidi ǵoi. Meni de kirgizbeýi múmkin. Bul jaq - jeke memleket. Men bylai topshylap otyrmyn, bul jerde Nazarbaevtardyń rezidentsiiasy bar. Ol ári ornalasqan. Biraq osy jolmen barady. Soǵan eshkimdi jolatpaý úshin qorshap tastaǵan", - degen edi depýtat.
Premer-ministrdiń orynbasary Serik Jumanǵarin Maqsat Tolyqbaidyń saýalyna jaýap berdi. Jaýapta Qarasai aýdany prokýratýrasynyń 2023 jylǵy 9 aqpandaǵy jer zańnamasy talaptary buzylǵanyn joiý týraly usynysy Almaty oblysynyń jer resýrstaryn basqarý departamentine engizilgeni aitylady.
"Prokýratýranyń jer zańnamasy talaptarynyń buzýshylyqtaryn joiý týraly usynysynda zańdy tulǵalarǵa jer ýchaskelerin berý barysynda atqarýshy organdardyń Jer kodeksiniń talaptaryn buzǵany habarlanǵan: "Dúnie Agro" JShS-ne (qazirgi "Steppe AgroMeat" JShS) alańy 193,0 (kadastrlyq nómiri 03-047-152-007) jáne 3408 gektar (kadastrlyq nómiri 03-047-542-029), sondai-aq, "Dúnie Korporatsiiasy" JAQ-na (qazirgi "QazAgroCentre" JShS) alańy 5640,0 gektar (4549,35 gektar kadastrlyq nómiri 03-047-542-030, 1004,74 gektar kadastrlyq nómiri 03-047-152-008 jáne 85,95 gektar kadastrlyq nómiri 03-047-163-844) jer ýchaskeleri", - dep jazylǵan jaýapta.
Osy rette departament byltyr naýryz ben sáýirde Almaty oblysynyń Qarasai aýdandyq sotyna jáne Almaty oblysynyń mamandandyrylǵan aýdanaralyq ekonomikalyq sotyna jer ýchaskelerin satyp alý-satý kelisimsharttardy zańsyz dep taný jáne onyń kúshin joiý jóninde úsh talap-aryz joldaǵan. Alaida "Dúnie-Agro" JShS-ne tiesili kólemi 193,0 gektar jer ýchaskesine berilgen talap aryz Almaty oblysynyń Qarasai aýdandyq sotynyń (2023 jylǵy 27 qarashadaǵy №1952-23-00-2/360) sheshimimen qanaǵattandyrylmaǵan.
Departament bul sheshimmen kelispei, 2023 jylǵy jeltoqsanda Almaty oblystyq sotynyń azamattyq ister jónindegi sot alqasyna apelliatsiialyq shaǵym bergen (20 aqpanda saǵat 17:30-da qaraý josparlanǵan). Al qalǵan eki talap-aryz qazir Almaty oblysy Qarasai aýdandyq soty men Almaty oblysynyń mamandandyrylǵan aýdanaralyq ekonomikalyq sotynda qaralyp jatyr.
