پرەمەر-مينيستردىڭ ورىنباسارى سەرىك جۇمانعارين ءۇشقوڭىردا 15 مىڭ گەكتار جەردى قارۋلى كۇزەت قورشاپ العانى تۋرالى اقپاراتقا جاۋاپ بەردى، - دەپ حابارلايدى Dalanews.kz.
ءماجىلىس دەپۋتاتى ماقسات تولىقباي الماتى وبلىسىن شامالعان اۋىلىنداعى ءۇشقوڭىر تاۋى قورشالىپ، ول جەرگە كىرە الماعانىن ايتقان بولاتىن. ونىڭ ايتۋىنشا، مەملەكەتتىڭ 15 مىڭ گەكتار جەرىن قارۋلانىپ العان كۇزەتشىلەر قورشاپ العان.
"تابيعاتى كەرەمەت جەر. بۇل جەردە جولدى جاۋىپ، قورشاپ تاستاعان. قارۋلى ادامداردى قويىپ تاستاعان. ەشكىمدى وتكىزبەيدى. ەل وزدەرىنىڭ جايىلىم جەرىنە بارا الماي وتىر. مەملەكەتتىك اكتىلەرى بارلار دا كىرە الماي وتىر. مەن كىرۋىم مۇمكىن، باسقالاردى كىرگىزبەيدى عوي. مەنى دە كىرگىزبەۋى مۇمكىن. بۇل جاق - جەكە مەملەكەت. مەن بىلاي توپشىلاپ وتىرمىن، بۇل جەردە نازاربايەۆتاردىڭ رەزيدەنسياسى بار. ول ءارى ورنالاسقان. ءبىراق وسى جولمەن بارادى. سوعان ەشكىمدى جولاتپاۋ ءۇشىن قورشاپ تاستاعان"، - دەگەن ەدى دەپۋتات.
پرەمەر-مينيستردىڭ ورىنباسارى سەرىك جۇمانعارين ماقسات تولىقبايدىڭ ساۋالىنا جاۋاپ بەردى. جاۋاپتا قاراساي اۋدانى پروكۋراتۋراسىنىڭ 2023 جىلعى 9 اقپانداعى جەر زاڭناماسى تالاپتارى بۇزىلعانىن جويۋ تۋرالى ۇسىنىسى الماتى وبلىسىنىڭ جەر رەسۋرستارىن باسقارۋ دەپارتامەنتىنە ەنگىزىلگەنى ايتىلادى.
"پروكۋراتۋرانىڭ جەر زاڭناماسى تالاپتارىنىڭ بۇزۋشىلىقتارىن جويۋ تۋرالى ۇسىنىسىندا زاڭدى تۇلعالارعا جەر ۋچاسكەلەرىن بەرۋ بارىسىندا اتقارۋشى ورگانداردىڭ جەر كودەكسىنىڭ تالاپتارىن بۇزعانى حابارلانعان: "دۇنيە اگرو" جشس-نە (قازىرگى "Steppe AgroMeat" ج ش س) الاڭى 193،0 (كاداسترلىق ءنومىرى 03-047-152-007) جانە 3408 گەكتار (كاداسترلىق ءنومىرى 03-047-542-029)، سونداي-اق، "دۇنيە كورپوراسياسى" جاق-نا (قازىرگى "QazAgroCentre" ج ش س) الاڭى 5640،0 گەكتار (4549،35 گەكتار كاداسترلىق ءنومىرى 03-047-542-030، 1004،74 گەكتار كاداسترلىق ءنومىرى 03-047-152-008 جانە 85،95 گەكتار كاداسترلىق ءنومىرى 03-047-163-844) جەر ۋچاسكەلەرى"، - دەپ جازىلعان جاۋاپتا.
وسى رەتتە دەپارتامەنت بىلتىر ناۋرىز بەن ساۋىردە الماتى وبلىسىنىڭ قاراساي اۋداندىق سوتىنا جانە الماتى وبلىسىنىڭ مامانداندىرىلعان اۋدانارالىق ەكونوميكالىق سوتىنا جەر ۋچاسكەلەرىن ساتىپ الۋ-ساتۋ كەلىسىمشارتتاردى زاڭسىز دەپ تانۋ جانە ونىڭ كۇشىن جويۋ جونىندە ءۇش تالاپ-ارىز جولداعان. الايدا "دۇنيە-اگرو" جشس-نە تيەسىلى كولەمى 193،0 گەكتار جەر ۋچاسكەسىنە بەرىلگەن تالاپ ارىز الماتى وبلىسىنىڭ قاراساي اۋداندىق سوتىنىڭ (2023 جىلعى 27 قاراشاداعى №1952-23-00-2/360) شەشىمىمەن قاناعاتتاندىرىلماعان.
دەپارتامەنت بۇل شەشىممەن كەلىسپەي، 2023 جىلعى جەلتوقساندا الماتى وبلىستىق سوتىنىڭ ازاماتتىق ىستەر جونىندەگى سوت القاسىنا اپەللياسيالىق شاعىم بەرگەن (20 اقپاندا ساعات 17:30-دا قاراۋ جوسپارلانعان). ال قالعان ەكى تالاپ-ارىز ءقازىر الماتى وبلىسى قاراساي اۋداندىق سوتى مەن الماتى وبلىسىنىڭ مامانداندىرىلعان اۋدانارالىق ەكونوميكالىق سوتىندا قارالىپ جاتىر.
