Jýrnalıs, qoǵam belsendisi Dına Elgezek Ashat Asylbekovke bergen suhbatynda Darıǵa Nazarbaeva men Rahat Álıev qazaq halqynyń taǵdyryna qalaı áser etkenin aıtty, - dep habarlaıdy Dalanews.kz.

Dına Elgezektiń sózinshe, eks-prezıdenttiń tuńǵyshy men kúıeý balasy "Habar" agenttiginde basshylyq qyzmette bolǵan.

"1999 jyldyń sońynda 2000 jyldardyń basynda (Habarǵa - esk.) keldim. Sol kezde basshymyz (Álıev pen Nazarbaeva - esk.) boldy. Shynyn aıtqanda, ótken 30 jylǵa qaraımyz, qazaq halqynyń kórgen qorqynyshty túsindeı eken. Osy erli-zaıypty - qazaq halqyna, taǵdyryna áser etken tulǵalar.

Baılyqtan, ashkózdikten medıalardy satyp alyp jatty.

Sóz bostandyǵy qysymǵa ushyrady. Demokratıa degen nárseni umyta bastadyq.

Prezıdenttiń ózinde eki túrli tańdaý turdy: avtokratıalyq apan, ekinshisi demokratıalyq tańdaý degen. Biraq Nursultan Nazarbaev óziniń otbasyn tańdady, onyń otbasy avtokratıalyq rejımdi tańdady.

Odan keıingi nebir sumdyq tarıh, reıderlik jasap otyrdy. Balalaryna sheksiz bılik berý arqyly Nazarbaevtyń taǵdyry nemen aıaqtaldy?!" - deıdi jýrnalıs.

Dına Elgezek Darıǵa Nazarbaeva keıin tipti ákesiniń ornyna kóz tikkenin aıtady.

"Asar" partıasy paıda boldy. Ákesimen jarysyp partıa quramyn dep júrdi. Ákesiniń ornyna Prezıdent bolamyn degen nyshan sol kezde baıqala bastady.

Ekeýinde de (Álıevte de - esk.) paıda bola bastady. Sońy ne bolǵanyn kórip otyrsyz ǵoı. Rahat Álıevtiń taǵdyry nemen aıaqtaldy?! Balasynyń taǵdyry ne boldy?! Sumdyq kórinister", - deıdi ol.

Qoǵam belsendisi qazaqtyń jaǵdaıyn kimder turalatqanyn atady.

"Bizde úsh túrli trıada - jemqorlar, Nazarbaevtyń klany jáne otbasy. Osy úshbasty aıdahar memleketimizdiń túbine jete jazdady. Osynyń ishinde memlekettiń taǵdyryna áser etken osy eki tulǵa (Álıev pen Nazarbaeva - esk.) boldy. ...Qatty aıtqanym emes, bular qazaq halqyn quldyqta ustady dep aıtýǵa bolady. Qazaq halqynyń qojaıyny bola bastady", - dedi jýrnalıs.