Filmde bas qalanyń irgetasyn qalaýdaǵy Nursultan Nazarbaevtyń eńbegi, kezdesken qiyndyqtardy jeńe bilýdiń jarqyn úlgisi, is basynda bolǵan, Elbasynyń tapsyrmalaryn múltiksiz oryndai bilgen azamattardyń qyzmeti, halyqtyń birligi, jurtshylyqtyń yqylasy, senimi baiandalady.
Sondai-aq, elordany kóshirý sheshimine qatysty qoǵamdyq san-qily kózqarastar, onyń ishinde kertartpa pikirlerin kóldeneń tartqandar da kórinis tapty.
Filmde qamtylǵan jyldar elimiz úshin asa mańyzdy tarihi oqiǵalar sátimen usynylǵan. Ásirese el shekarasyn shegendeý, ózge eldermen yntymaqtastyq ornatý baǵytyndaǵy mańyzdy qadamdardy sanada jańǵyrtatyn tustar kóńilge jyly áser etti. Sonymen birge Astananyń halyqaralyq tusaýkeser rásimin sipattaityn kórinister de kórkem dúnieniń mańyzyn arttyra tústi.
Búginge deiin «Elbasy joly» kinoepopeiasynyń bes kartinasy kórermen nazaryna usynylǵan-dy. «Balalyq shaǵymnyń aspany» (2011 jyl), «Otty ózen», «Temirtaý» (2013 jyl), «Tyǵyryqtan jol tapqan» (2014 jyl) – rejisseri Rústem Ábdirashev, «Juldyzdar toǵysqanda» (2016 jyl) – rejisseri Sergei Snejkin (Resei). Rústem Ábdirashev túsirgen alǵashqy tórt bólimde Memleket basshysynyń rólin akter Nurlan Álimjanov somdasa, Sergei Snejkinniń filminde bas keiipkerdiń rólin akter Berik Aitjanov oinady.
Kórermender filmniń el táýelsizdigindegi mańyzdy qadamdardy jańa qyrynan tanytqanyn, mol áser alǵandaryn aityp, tarqasty. "Tarihty tulǵalar jasap, qalyptastyrsa, «Elbasy joly. Astana» filmi urpaqty uly isterge bastaityn, jigerlendiretin dúnielerdiń qataryn tolyqtyrdy" desti ordabasylyqtar.
