فيلمدە باس قالانىڭ ىرگەتاسىن قالاۋداعى نۇرسۇلتان نازاربايەۆتىڭ ەڭبەگى، كەزدەسكەن قيىندىقتاردى جەڭە ءبىلۋدىڭ جارقىن ۇلگىسى، ءىس باسىندا بولعان، ەلباسىنىڭ تاپسىرمالارىن مۇلتىكسىز ورىنداي بىلگەن ازاماتتاردىڭ قىزمەتى، حالىقتىڭ بىرلىگى، جۇرتشىلىقتىڭ ىقىلاسى، سەنىمى باياندالادى.
سونداي-اق، ەلوردانى كوشىرۋ شەشىمىنە قاتىستى قوعامدىق سان-قيلى كوزقاراستار، ونىڭ ىشىندە كەرتارتپا پىكىرلەرىن كولدەنەڭ تارتقاندار دا كورىنىس تاپتى.
فيلمدە قامتىلعان جىلدار ەلىمىز ءۇشىن اسا ماڭىزدى تاريحي وقيعالار ساتىمەن ۇسىنىلعان. اسىرەسە ەل شەكاراسىن شەگەندەۋ، وزگە ەلدەرمەن ىنتىماقتاستىق ورناتۋ باعىتىنداعى ماڭىزدى قادامداردى سانادا جاڭعىرتاتىن تۇستار كوڭىلگە جىلى اسەر ەتتى. سونىمەن بىرگە استانانىڭ حالىقارالىق تۇساۋكەسەر ءراسىمىن سيپاتتايتىن كورىنىستەر دە كوركەم دۇنيەنىڭ ماڭىزىن ارتتىرا ءتۇستى.
بۇگىنگە دەيىن «ەلباسى جولى» كينوەپوپەياسىنىڭ بەس كارتيناسى كورەرمەن نازارىنا ۇسىنىلعان-دى. «بالالىق شاعىمنىڭ اسپانى» (2011 جىل)، «وتتى وزەن»، «تەمىرتاۋ» (2013 جىل)، «تىعىرىقتان جول تاپقان» (2014 جىل) – رەجيسسەرى رۇستەم ابدىراشيەۆ، «جۇلدىزدار توعىسقاندا» (2016 جىل) – رەجيسسەرى سەرگەي سنەجكين (رەسەي). رۇستەم ابدىراشيەۆ تۇسىرگەن العاشقى ءتورت بولىمدە مەملەكەت باسشىسىنىڭ ءرولىن اكتەر نۇرلان ءالىمجانوۆ سومداسا، سەرگەي سنەجكيننىڭ فيلمىندە باس كەيىپكەردىڭ ءرولىن اكتەر بەرىك ايتجانوۆ وينادى.
كورەرمەندەر ءفيلمنىڭ ەل تاۋەلسىزدىگىندەگى ماڭىزدى قادامداردى جاڭا قىرىنان تانىتقانىن، مول اسەر العاندارىن ايتىپ، تارقاستى. "تاريحتى تۇلعالار جاساپ، قالىپتاستىرسا، «ەلباسى جولى. استانا» ءفيلمى ۇرپاقتى ۇلى ىستەرگە باستايتىن، جىگەرلەندىرەتىن دۇنيەلەردىڭ قاتارىن تولىقتىردى" دەستى ورداباسىلىقتار.
