Abai oblysy Besterek aýylynda balalardy qaǵyp ketken kóliktiń tizgininde bolǵan azamattyń uly ákesiniń jaǵdaiy jaily aitty, dep habarlaidy Dalanews.kz.
Onyń sózinshe, apattan keiin ákesi adamdardy tanymaityn kúige túsken.
Belgili bolǵandai, 55 jastaǵy aýyl turǵyny jiyrma jyldan astam ýaqyt avtobýs júrgizýshisi bolyp eńbek etken. Qaiǵyly oqiǵa bolǵan kúni er adamǵa júrek talmasy soqqan, sonyń saldarynan ol róldi basqara almai qalǵan.
“Ákemniń densaýlyǵy óte aýyr. Soǵan qaramastan ol qamaýda otyr. Ustama soqqannan keiin ol eshkimdi tanymai qaldy. Sol sátte qasynda anam bolǵan. Bári áp-sátte oryn aldy. Bul – úlken qasiret. Qaza tapqan balalardyń otbasyna qaiǵyryp kóńil aitamyz. Keshirim suraimyz”, – dedi júrgizýshiniń uly Erkanat Serikuly “7 arnaǵa” bergen suhbatynda.
Eske salsaq, biyl 19 tamyzda Besterek aýylynda úi mańynda oinap júrgen balalardy kólik qaǵyp ketti. Oqiǵa saldarynan 2 jastan 7 jasqa deiingi úsh bala qaza taýyp, taǵy úsheýi jaraqat aldy. Qaiǵyly jaǵdaidan qaza bolǵandardyń ekeýi bul aýylǵa ájesi men atasyna qonaqqa kelgen eken.
20 tamyzda zardap shekken eki bala sanaviatsiiamen Astanaǵa jetkizildi. Al jaǵdaiy aýyr bolǵan taǵy bir qyz oblystyq aýrýhanada qaldy.
Aita keteiik, kúni keshe Densaýlyq saqtaý ministri Aqmaral Álnazarova jol-kólik oqiǵasy saldarynan zardap shekken balalarǵa bardy.
Ministr Astana qalasynyń №2 kópbeiindi balalar aýrýhanasyna jatqyzylǵan eki balanyń jaǵdaiymen jeke tanysty.
Jaraqattyq shok jaǵdaiynda, jilinshik, qol jaraqattarymen túsken zardap shekken balany turaqtandyrýǵa qol jetkizildi jáne búgin ol reanimatsiiadan kádimgi palataǵa aýystyrylady, dep habarlady bólimshe dárigerleri.
Aqmaral Álnazarova balalar aýrýhanasynyń emdeýshi dárigerlerimen áńgimelesti, oqiǵadan keiingi alǵashqy saǵattan bastap shuǵyl kómektiń tolyq kólemin qamtamasyz etken mýltidistsiplinalyq brigadalardyń úilesimdi jumysyn atap ótti.
Sapar barysynda vedomstvo basshysy balanyń anasymen kezdesip, tezirek qalpyna kelýin tilep, shyn júrekten qoldaý bildirdi.
«Bizdiń balalarymyzdyń densaýlyǵy men ómiri basty basymdyq bolyp tabylady. Memleket olardy qalpyna keltirý úshin qoldan kelgenniń bárin jasaidy. Men kishkentai patsientterdi qutqarýǵa jedel qatysqan dárigerlerge alǵysymdy bildiremin. Balalarǵa tezirek saýyǵyp ketýin, al týystaryna - osy qiyn ýaqytta kúsh pen shydamdylyq tileimin», - dep atap ótti Aqmaral Álnazarova.
Densaýlyq saqtaý ministrligi JKO-dan zardap shekken balalardy emdeý protsesin erekshe baqylaýda ustaýdy jalǵastyrady.
