اباي وبلىسى بەستەرەك اۋىلىندا بالالاردى قاعىپ كەتكەن كولىكتىڭ تىزگىنىندە بولعان ازاماتتىڭ ۇلى اكەسىنىڭ جاعدايى جايلى ايتتى، دەپ حابارلايدى Dalanews.kz.
ونىڭ سوزىنشە، اپاتتان كەيىن اكەسى ادامداردى تانىمايتىن كۇيگە تۇسكەن.
بەلگىلى بولعانداي، 55 جاستاعى اۋىل تۇرعىنى جيىرما جىلدان استام ۋاقىت اۆتوبۋس جۇرگىزۋشىسى بولىپ ەڭبەك ەتكەن. قايعىلى وقيعا بولعان كۇنى ەر ادامعا جۇرەك تالماسى سوققان، سونىڭ سالدارىنان ول ءرولدى باسقارا الماي قالعان.
“اكەمنىڭ دەنساۋلىعى وتە اۋىر. سوعان قاراماستان ول قاماۋدا وتىر. ۇستاما سوققاننان كەيىن ول ەشكىمدى تانىماي قالدى. سول ساتتە قاسىندا انام بولعان. ءبارى اپ-ساتتە ورىن الدى. بۇل – ۇلكەن قاسىرەت. قازا تاپقان بالالاردىڭ وتباسىنا قايعىرىپ كوڭىل ايتامىز. كەشىرىم سۇرايمىز”، – دەدى جۇرگىزۋشىنىڭ ۇلى ەركانات سەرىك ۇلى “7 ارناعا” بەرگەن سۇحباتىندا.
ەسكە سالساق، بيىل 19 تامىزدا بەستەرەك اۋىلىندا ءۇي ماڭىندا ويناپ جۇرگەن بالالاردى كولىك قاعىپ كەتتى. وقيعا سالدارىنان 2 جاستان 7 جاسقا دەيىنگى ءۇش بالا قازا تاۋىپ، تاعى ۇشەۋى جاراقات الدى. قايعىلى جاعدايدان قازا بولعانداردىڭ ەكەۋى بۇل اۋىلعا اجەسى مەن اتاسىنا قوناققا كەلگەن ەكەن.
20 تامىزدا زارداپ شەككەن ەكى بالا ساناۆياسيامەن استاناعا جەتكىزىلدى. ال جاعدايى اۋىر بولعان تاعى ءبىر قىز وبلىستىق اۋرۋحانادا قالدى.
ايتا كەتەيىك، كۇنى كەشە دەنساۋلىق ساقتاۋ ءمينيسترى اقمارال ءالنازاروۆا جول-كولىك وقيعاسى سالدارىنان زارداپ شەككەن بالالارعا باردى.
مينيستر استانا قالاسىنىڭ №2 كوپبەيىندى بالالار اۋرۋحاناسىنا جاتقىزىلعان ەكى بالانىڭ جاعدايىمەن جەكە تانىستى.
جاراقاتتىق شوك جاعدايىندا، جىلىنشىك، قول جاراقاتتارىمەن تۇسكەن زارداپ شەككەن بالانى تۇراقتاندىرۋعا قول جەتكىزىلدى جانە بۇگىن ول رەانيماسيادان كادىمگى پالاتاعا اۋىستىرىلادى، دەپ حابارلادى بولىمشە دارىگەرلەرى.
اقمارال ءالنازاروۆا بالالار اۋرۋحاناسىنىڭ ەمدەۋشى دارىگەرلەرىمەن اڭگىمەلەستى، وقيعادان كەيىنگى العاشقى ساعاتتان باستاپ شۇعىل كومەكتىڭ تولىق كولەمىن قامتاماسىز ەتكەن مۋلتيديسيپلينالىق بريگادالاردىڭ ۇيلەسىمدى جۇمىسىن اتاپ ءوتتى.
ساپار بارىسىندا ۆەدومستۆو باسشىسى بالانىڭ اناسىمەن كەزدەسىپ، تەزىرەك قالپىنا كەلۋىن تىلەپ، شىن جۇرەكتەن قولداۋ ءبىلدىردى.
«ءبىزدىڭ بالالارىمىزدىڭ دەنساۋلىعى مەن ءومىرى باستى باسىمدىق بولىپ تابىلادى. مەملەكەت ولاردى قالپىنا كەلتىرۋ ءۇشىن قولدان كەلگەننىڭ ءبارىن جاسايدى. مەن كىشكەنتاي پاسيەنتتەردى قۇتقارۋعا جەدەل قاتىسقان دارىگەرلەرگە العىسىمدى بىلدىرەمىن. بالالارعا تەزىرەك ساۋىعىپ كەتۋىن، ال تۋىستارىنا - وسى قيىن ۋاقىتتا كۇش پەن شىدامدىلىق تىلەيمىن»، - دەپ اتاپ ءوتتى اقمارال ءالنازاروۆا.
دەنساۋلىق ساقتاۋ مينيسترلىگى جكو-دان زارداپ شەككەن بالالاردى ەمدەۋ پروسەسىن ەرەكشە باقىلاۋدا ۇستاۋدى جالعاستىرادى.
