Astana qalalyq qylmystyq ister jónindegi aýdanaralyq sotynyń derekterine sáikes, Batyrbaev 2021 jyly sheteldik kompaniialarmen naryqtan tómen baǵada 13 kelisimshart jasasqan. Memleketke keltirilgen zalal kólemi 20,1 mlrd teńgeden asady. Batyrbaev osylaisha jyldyq jospardy 120%-ǵa asyra oryndaǵan. Sol úshin 2022 jyly ol "Qazatomónerkásipten" 54 mln teńgeden astam bonýs alǵan, onyń 9 mln teńgesi tikelei osy 13 mámilemen bailanysty bolǵan.
Sotta Batyrbaev óz kinásin moiyndamady, ol kelisimsharttardyń syiaqy mólsherine áser etetinin bilmegenin, sheteldik kompaniialardyń múddesin qorǵamaǵanyn aitty. Onyń aitýynsha, baǵa usynystar boiynsha bir fýnt úshin aptalyq nemese ailyq baǵadan belgilenedi. Odan keiin usynys áleýetti satyp alýshyǵa jiberiledi. Eger satyp alýshy baǵamen kelispese, onda ol jeńildik surai alady. Al jeńildikter máselesi ishki keńesterde talqylanady jáne "Qazatomónerkásip "UAK" AQ Basqarmasy men direktorlar keńesiniń otyrystarynda taldanady. Olar maquldanǵannan keiin ǵana kelisimsharttar jasalady.
Sot Batyrbaev kelisimsharttardyń merzimin buzdy degen qorytyndyǵa keldi. Osyǵan bailanysty ýran tómen baǵamen satylǵan. Basqarma men direktorlar keńesi otyrystaryndaǵy beinejazbalar taldanǵan, onda jeńildikter jaiy talqylanbaidy. Batyrbaev diskonttyń belgilengen mólsherin ǵana aitady. Otyrystardyń jazbasha hattamalarynda basshylyqtyń ýrannyń naryqtyq qunynan 5%-ǵa deiin tómen jeńildikpen berýge ruqsat bergen kelisimi joq.
Sot sottalýshy Batyrbaevtyń munyń bárin syiaqy alý úshin jasady dep tanydy. Ol QR QK-niń 361-baby, 3-tarmaǵynyń 4-bóligi (aýyr zardaptarǵa ákep soqqan laýazymdyq ókilettikterdi teris paidalaný) boiynsha kináli dep tanylyp, zańsyz alynǵan syiaqy - 9 mln teńgeni qaitarý, 4,5 jylǵa bas bostandyǵynan aiyrý jazasyna kesildi.
Sot Prezidentke Batyrbaevty "Eren eńbegi úshin" memlekettik nagradasynan aiyrý týraly usynys engizip, "Samuryq-Qazyna" AQ paidasyna 20,1 mlrd teńge kóleminde materialdyq zalal somasyn óndirip aldy.
Ǵalymjan Pirmatov 2021 jyly tamyzda "Qazatomónerkásip" UAK" AQ basqarmasy tóraǵasy qyzmetinen óz erkimen ketken.
Buǵan deiin saitymyzda "Tramp Jarlyqqa qol qoiǵannan keiin Kazatomprom aktsiialarynyń quny sharyqtai jóneldi" degen maqala jariialanǵan bolatyn.
