Qazaqstannyń Sybailas jemqorlyqqa qarsy qyzmeti belgiialyq kásipker ári investor Frenk Djozef Monstreige izdeý jariialady. Bul aqparat Bas prokýratýranyń quqyqtyq statistika jáne arnaiy esepke alý organdarynyń portalynda paida boldy, dep habarlaidy dalanews.kz tengrinews.kz-ke siltep.
Izdestirý isi eki kún buryn Astanada tirkelgen. Oǵan Ulttyq qaýipsizdik komiteti bastamashy bolǵan, al isti UQK janyndaǵy Sybailas jemqorlyqqa qarsy qyzmet júrgizip jatyr. Ázirge Frenk Djozef Monstreidiń naqty qandai is boiynsha izdestirilip jatqany jáne onyń mártebesi qandai ekeni aitylmaǵan.
Ashyq derekkóz málimetinshe, Frenk Djozef Monstrei - belgiialyq kásipker, investor jáne burynǵy munai magnaty. Ol 2000 jyldardan beri postkeńestik elderde, sonyń ishinde Qazaqstanda biznes júrgizgen.
Qazaqstandaǵy negizgi jobalarynyń biri - burynǵy Zhaikmunai ataýymen belgili bolǵan munai-gaz kompaniiasy Nostrum Oil & Gas. Keiin ol kompaniiany London qor birjasyna shyǵaryp, munai-gaz salasynan ketken.
Birqatar jariialanymda Monstreidiń aty qashqyn bankir Muhtar Ábliazovpen jáne Nostrum Oil & Gas aktivteri tóńiregindegi daýlarmen bailanysty atalǵan.
Dese de Monstreidiń ózi buǵan deiin jýrnalisterge Ábliazovtiń senimdi adamy bolmaǵanyn aityp, másele Qazaqstandaǵy burynǵy seriktestik aiasyndaǵy qaryzdy qaitarýǵa qatysty týǵanyn málimdegen. Onyń sózinshe, ózi tek eki tarap arasyndaǵy janjalǵa aralasyp ketken.
