Ýniversiadada úzdikter alda keledi
Stýdentterge arnalǵan sporttyq mereke. Beiresmi túrde ýniversiadany qatysýshylar osylai sipattaidy. Degenmen biylǵy shara burynǵysynan ózgerek. Birinshiden, barlyq saiyskerlerden PTR synaǵynyń nátijesi talap etildi. Ekinshiden, kórermender sany shekteýli boldy. Jattyqtyrýshylardyń aitýynsha, ýniversiada jastar sportyn damytýda mańyzdy rólge ie. Sonymen birge kóptegen stýdentterdiń sporttyq mansabyndaǵy alǵashqy baspaldaǵyna ainalýy múmkin. Deneshynyqtyrý jáne sport kafedrasynyń meńgerýshisi Ermek Dilmahanbetovtiń aitýynsha, biyl bizdiń stýdentter ýniversiadaǵa 24 sport túrinen qatysýda. Qazirgi tańda sonyń 17-si birinshi oryn alyp, QazUÝ qurama komandasy ázirge elimizdegi JOO-lar arasynda alda keledi.
Biyl birinshi oryn alǵan stýdentterdiń barlyǵy alda bolatyn Dúniejúzilik ýniversiadaǵa qatysady. Olardyń arasynda olimpiadaǵa litsenziia alǵan balalar da bar. Bizdiń sportshylar Qazaqstannyń ulttyq qurama komandasyna múshe bolǵandyqtan, barlyǵy derlik joǵary ligada oinaidy.
– Sońǵy kezderi stýdenttik sportqa kóp kóńil bólinýde. Qazir JOO-ǵa ýniversiadanyń kem degende 20 sport túrine qatysý týraly talap qoiylady, – deidi E.Dilmahanbetov. Sonyń biri – jaǵajai voleiboly. Jattyqtyrýshy Nikolai Iýdakovtyń aitýynsha, saiys óte tartysty ótken.
– Ýniversiada – stýdenttik sporttaǵy eń jaýapty jáne mańyzdy sporttyq shara. Bizdiń maqsatymyz maksimaldy nátijege jetý boldy. Sol úshin sportshylarymyzdy jaqsylap baptadyq. Qyzdar men jigitter birde-bir oiynda jeńilmei, qarsylastaryn shań qaptyrdy. Bapker retinde maǵan eki altyn medal alý tapsyryldy. Sondyqtan jeńilýge bolmaitynyn túsindim. Óitkeni 2009 jyldan beri ótkizilgen ýniversiadada qatarynan jeti ret biz osy mejeden taiǵan emespiz. Jarys barysynda aitarlyqtai qiyndyqtar bolǵan joq. Tek finalda Óskemen qalasynyń ShQTÝ komandasymen tartysty oiyn boldy. Óitkeni bul toptyń oiynshylary jasy men tájiribesi jaǵynan úlken bolatyn. Degenmen bizdiń qyz-jigitter ýniversitet namysyn qorǵap, jeńiske jetti, – deidi QazUÝ quramasynyń jattyqtyrýshysy N.Iýdakov.
Onyń aitýynsha, QazUÝ-da jaǵajai voleibolyn damytýǵa barlyq jaǵdai jasalǵan.
– 2009 jyldan bastap eki alańdy paidalana otyryp tórt kort salyndy. Júz adamǵa arnalǵan tribýnalar turǵyzylyp, jarys ótkizýge qajetti jabdyqtar alynǵan. Bul kortta ýniversiada, respýblikalyq chempionattar jáne halyqaralyq týrnirler ótkiziledi. Sonymen birge oqý ordasyndaǵy jaǵajai korttary olimpiadalyq akkreditatsiiadan ótken. Aldaǵy ýaqytta jaǵajai voleibolyna arnalǵan elimizdegi alǵashqy qysqy qumdy sportzal salý josparlanýda. Biz olimpiadalyq daiyndyq ortalyǵymen jumys isteimiz. Al stýdentterimiz Qazaqstan Respýblikasynyń jastar men qurama komandalarynyń músheleri, – dep atap ótti N.Iýdakov.
Ýniversiada barysynda QazUÝ stýdentteri úzdik óner kórsetken taǵy bir sport túri – semserlesý. QR eńbek sińirgen jattyqtyrýshysy Vilor Diaokokinniń aitýynsha, JOO-lar arasynda semserlesýden básekelestik tájiribeniń joqtyǵy baiqalǵan.
– Soǵan qaramastan, sportshylar joǵary sheberlik pen jarysqa degen yqylasyn kórsetti. Jarystar barlyq sanitarlyq normalarǵa sáikes uiymdastyryldy. Sondyqtan uiymdastyrýshylarǵa, QazUÝ sport klýby men Deneshynyqtyrý tárbiesi kafedrasyna úlken alǵys bildiremiz. Osy tusta QazUÝ stýdentteriniń ónerine toqtalǵym keledi. Pandemiiaǵa qaramastan, olar fizikalyq jáne tehnikalyq jaǵynan jaqsy daiyndalǵan. Mysaly, jeke jarysta semserlesýden meditsina fakýltetiniń 1-kýrs stýdenti Kámila Bekbolat men Bekasyl Tileýbek chempion atandy. Al Aleksandr Savin, Ilnur Ǵabitov, Daiana Mamyrbekova, Diana Mamyrbekova, Viktoriia Zinova, Karina Dospai jeke jarysta júldeger boldy. Sonymen birge olar komandalyq jarysta da chempion atanyp, QazUÝ jalpykomandalyq esepte 1-oryndy jeńip aldy. Jaýapkershiligi, janqiiarlyǵy men dostyq qarym-qatynasy úshin saiysqa qatysqan barlyq stýdentterge raqmet. Olar bir-birine qoldaý kórsetti. Tek osylai jeńiske jetýge bolady. Sondai-aq osy jarysta Dúniejúzilik ýniversiadada óner kórsetetin QR stýdenttik quramasyna úmitkerler irikteldi, – deidi V.Diaokokin.
Qarashańyraq osylaisha óńir-óńirden kelgen talantty sportshylardyń baǵyn ashyp, babyna keltiretin oqý orny ekenin taǵy da bir dáleldedi. Al jeńiske jetken jastar ýniversiada úzdikteri retinde álemdik arenada óner kórsetetin bolady.
