Densaýlyq saqtaý mınıstrligi úndistandyq qaýipti jótelge qarsy sıroptarǵa baılanysty qazaqstandyqtarǵa úndeý jasady, dep habarlaıdy Dalanews.kz.
Medısınalyq jáne farmasevtıkalyq baqylaý komıtetiniń habarlaýynsha, Dúnıejúzilik densaýlyq saqtaý uıymy Úndistanda óńdirilgen úsh jótelge qarsy sıroptan- COLDRIF, RespifreshTR jáne ReLife – ýly zat dıetılenglıkoldi anyqtady. Atalǵan sıroptar Sresan Pharmaceuticals, Rednex Remedies jáne Shape Pharma kompanıalarynda óndirilgen.
«Dárilik zattar men medısınalyq buıymdardy saraptaý ulttyq ortalyǵy úsh úndistandyq jótelge qarsy sırop- COLDRIF, Respifresh TR jáne ReLife – Qazaqstanda tirkelmegenin jáne sáıkestik sertıfıkattary joq ekenin habarlady»,- delingen habarlamada.
DDSU derekterine sáıkes, atalǵan dárilerdi qoldaný densaýlyqqa, ásirese balalar úshin, asa qaýipti bolýy múmkin. Dıetılenglıkol- ishke qabyldaǵan jaǵdaıda aýyr ýlaný men jedel búırek jetispeýshiligin týdyrýy múmkin ýly hımıalyq qosylys.
Qazaqstandyqtardy dárilik zattardy satyp alý kezinde saq bolýǵa, preparattardy tek lısenzıalanǵan dárihanalardan alýǵa jáne atalǵan sıroptardy qoldanýdan bas tartýǵa shaqyrady.
Eske salaıyq, buǵan deıin Úndistanda jótelge qarsy sıroptan bes jasqa deıingi 17 balanyń qaıtys bolǵany, taǵy 11 balanyń aýyr jaǵdaıda jatqany habarlanǵan bolatyn. Barlyq balalarda búırek jetispeýshiligi men mıǵa qatty zaqym kelý belgileri baıqalǵan. Bul jaǵdaılarǵa COLDRIF sıropynan tabylǵan ýly dıetılenglıkol zaty sebep bolǵan.
