دەنساۋلىق ساقتاۋ مينيسترلىگى ءۇندىستاندىق ءقاۋىپتى جوتەلگە قارسى سيروپتارعا بايلانىستى قازاقستاندىقتارعا ۇندەۋ جاسادى، دەپ حابارلايدى  Dalanews.kz.

مەديسينالىق جانە فارماسيەۆتيكالىق باقىلاۋ كوميتەتىنىڭ حابارلاۋىنشا، دۇنيەجۇزىلىك دەنساۋلىق ساقتاۋ ۇيىمى ءۇندىستاندا وڭدىرىلگەن ءۇش جوتەلگە قارسى سيروپتان- COLDRIF، RespifreshTR جانە ReLife – ۋلى زات ديەتيلەنگليكولدى انىقتادى. اتالعان سيروپتار Sresan Pharmaceuticals، Rednex Remedies جانە Shape Pharma كومپانيالارىندا وندىرىلگەن.

«دارىلىك زاتتار مەن مەديسينالىق بۇيىمداردى ساراپتاۋ ۇلتتىق ورتالىعى ءۇش ءۇندىستاندىق جوتەلگە قارسى سيروپ- COLDRIF، Respifresh TR جانە ReLife – قازاقستاندا تىركەلمەگەنىن جانە سايكەستىك سەرتيفيكاتتارى جوق ەكەنىن حابارلادى»،- دەلىنگەن حابارلامادا.

ددسۇ دەرەكتەرىنە سايكەس، اتالعان دارىلەردى قولدانۋ دەنساۋلىققا، اسىرەسە بالالار ءۇشىن، اسا ءقاۋىپتى بولۋى مۇمكىن. ديەتيلەنگليكول- ىشكە قابىلداعان جاعدايدا اۋىر ۋلانۋ مەن جەدەل بۇيرەك جەتىسپەۋشىلىگىن تۋدىرۋى مۇمكىن ۋلى حيميالىق قوسىلىس.

قازاقستاندىقتاردى دارىلىك زاتتاردى ساتىپ الۋ كەزىندە ساق بولۋعا، پرەپاراتتاردى تەك ليسەنزيالانعان  ءدارىحانالاردان الۋعا جانە اتالعان سيروپتاردى قولدانۋدان باس تارتۋعا شاقىرادى.

ەسكە سالايىق، بۇعان دەيىن ءۇندىستاندا جوتەلگە قارسى سيروپتان بەس جاسقا دەيىنگى 17 بالانىڭ قايتىس بولعانى، تاعى 11 بالانىڭ اۋىر جاعدايدا جاتقانى حابارلانعان بولاتىن. بارلىق بالالاردا بۇيرەك جەتىسپەۋشىلىگى مەن ميعا قاتتى زاقىم كەلۋ بەلگىلەرى بايقالعان. بۇل جاعدايلارعا COLDRIF سيروپىنان تابىلعان ۋلى ديەتيلەنگليكول زاتى سەبەپ بولعان.