Úndistannyń birneshe qalasynda bilik partiiasynyń ókilderi, oppozitsiia belsendileri, stýdentter men politsiia arasynda qaqtyǵys boldy. Narazylyq emtihan materialdarynyń syrtqa taraýyna jáne Telegram jelisiniń ýaqytsha buǵattalýyna bailanysty bastalǵan, dep habarlaidy dalanews.kz.
Sherýlerdi resmi tirkelmegen satiralyq "Halyqtyq taraqandar partiiasy" uiymdastyrǵan. Qozǵalys músheleri bilim ministri Dharmendra Pradhannyń otstavkaǵa ketýin talap etti.
20 shildede Delide atalǵan qozǵalystyń myńdaǵan jaqtaýshysy parlament ǵimaratyna qarai sherýge shyqqan. Politsiiamen bolǵan qaqtyǵystan, uiymdastyrýshylardyń málimetinshe, 60-qa jýyq narazylyq bildirýshi men 118 tártip saqshysy zardap shekken.
Kelesi kúni Úndistannyń basty oppozitsiialyq kúshi – Úndi ulttyq kongresiniń jetekshileri sherýshilerdi qoldap, premer-ministr Narendra Modidiń rezidentsiiasyna qarai bet alǵan. Aktsiia kezinde politsiia oppozitsiia jetekshisi Rahýl Gandidi jáne partiianyń basqa da ókilderin kúsh qoldanyp ustady. Keiin olar bosatyldy.
22 shildede Rahýl Gandi bilim ministriniń qyzmetten ketýin jáne premer-ministrdiń stýdentterge qarsy kúsh qoldanylǵany úshin keshirim suraýyn talap etti.
Osydan keiin biliktegi "Bharatiia djanata parti" men Úndi ulttyq kongresiniń jaqtastary eldiń birneshe qalasynda sherýge shyǵyp, kei jerlerde bir-birimen jáne politsiiamen qaqtyǵysqan.
Haidarabadta eki partiia ókilderi qarsylastarynyń shtab-páterine qarai sherýge shyqpaq bolǵan. Politsiia olardy toqtatýǵa tyrysqan kezde eki adam, onyń ishinde áiel politsiia qyzmetkeri jaraqat aldy.
Patna qalasynda bilik partiiasynyń jaqtastary oppozitsiia keńsesine barǵan kezde olarǵa bambýk taiaqtarymen qarýlanǵan adamdar shabýyl jasaǵan. Oqiǵaǵa politsiia aralasqan. Birneshe adamnyń qatty jaraqat alyp, qansyraǵany habarlandy.
Sol kúni Patnadaǵy aimaqtyq parlament mańynda júzdegen stýdent pen politsiia arasynda jappai tóbeles boldy. Narazylyq bildirýshilerdiń bir bóligi parlament aýmaǵyna basyp kirgennen keiin ákimshilik ǵimaratty ýaqytsha jaýyp, depýtattardy ishte qaldyrýǵa májbúr bolǵan
