Qazaqstan musylmandary dini basqarmasynyń tóraǵasy,
Bas múfti Erjan qajy MALǴAJYULYNYŃ
qasietti Ramazan aiyna bailanysty halyqqa
ÚNDEÝI
Asa qamqor, erekshe Meiirimdi Allanyń atymen bastaimyn!
Qurmetti otandastar, baýyrlar! Barshańyzdy kúlli musylman balasy saǵyna kútken, berekeli, qasietti Ramazan aiynyń kelýimen shyn júrekten quttyqtaimyn. Ramazan múbárak bolǵai!
Ramazan – jalpyǵa ortaq izgi amaldar maýsymy. Oraza – tárbie, sabyr, qaiyrymdylyq, izgilik mektebi.
Ramazan – qaiyrymdy jandar úshin úlken múmkindik. Orazada jasalǵan Jaratýshy Iemizge unamdy árbir qaiyrly is – úlken saýap. Paiǵambarymyz Muhammed (Allanyń oǵan salaýaty men sálemi bolsyn) bir ósietinde: «Adamdardyń jaqsysy – elge paidasy tigenderi», – degen. Adam qalai niet etse, sol maqsatyna jetedi.
Ár pende saýapty amalymen, taqýalyǵymen Allanyń aldynda dárejesi artady. Jomart, janashyr azamattardy, kásipkerlerdi kómekke muqtaj adamdarǵa qamqorlyq kórsetýge, máselen, sý tasqynynan úisiz, sharasyz qalǵan otandastarymyzǵa qaiyrymdylyq jasaýǵa, tabiǵi apat saldarynan buzylǵan úilerdi jóndeýge qolushyn berýge, jetim men jesirge meiirimdilik tanytyp, qaraýsyz qalǵan qarttarǵa kóńil bólýge shaqyramyn.
Zeket berý – jaǵdaiy kelgen (shariǵat boiynsha nisap mólsherine jetken) musylmanǵa paryz. Al zeket berekeli Ramazan aiynda berilse, onyń da saýaby eselenip jazylady.
Qasietti aidyń qurmeti úshin azyq-túlik, kókónis pen turmystyq zattarǵa jeńildik jasalyp, Qudaiy astar men sadaqalar aýyzashar ýaqytynda uiymdastyrylsa, toilar ishimdiksiz ótkizilse, jamandyqtyń bastaýy bolǵan araq-sharaptyń satylýyna barynsha jol berilmese degen tilegimdi bildiremin.
Sonymen qatar, kópshilik jurtqa orazanyń ár kúninde bir jaqsylyq jasaýdy josparlap, osynaý saýapty amaldardy yqylaspen oryndaýǵa, Allanyń árdaiym bizge úzdiksiz násip etetin nyǵmetterinen sadaqa berýge shaqyramyn. Izgi amaldar Ramazannan keiingi ailarda da jalǵasyn tapsa igi.
Ramazan – birlik aiy. Osy aida beriletin aýyzasharlar aǵaiyn-jurttyń arasyn jaqyndastyryp, igi is-sharalar men qaiyrymdylyq aktsiialar halqymyzdy senimi men násiline qaramai, ortaq maqsatqa úndeidi. Búkil álemniń Jaratýshysy barsha adamǵa: «Bólinbeńder», – dep baýyrmal bolýǵa buiyrǵan. Birligi kúshti eldiń berekesi artady. Birligimizge bekem bolaiyq!
Qadirli jamaǵat! Saýaby eselenip jazylatyn qasietti aida jasaǵan amaldarymyz ben izgi nietterimizdi Alla Taǵala qabyl etkei! Áýmin!
