Qazaqstan Úkimeti 2027–2029 jyldary Ulttyq qordan respýblikalyq biýdjetke shamamen 11,9 trln teńge transfert alýdy josparlap otyr, dep habarlaidy dalanews.kz.
Onyń 5 trln teńgesi áleýmettik, kommýnaldyq, energetikalyq jáne kólik infraqurylymyndaǵy mańyzdy jobalardy qarjylandyrýǵa arnalǵan nysanaly transfert bolady.
Bul sheshim Prezident Qasym-Jomart Toqaevtyń áleýmettik jáne infraqurylymdyq nysandardy ozyq qarqynmen salý jónindegi ustanymymen bailanysty. Buǵan deiin Memleket basshysy 2027–2029 jyldarǵa arnalǵan biýdjette halyqtyń ómir sapasyna tikelei áser etetin aýrýhanalar, balalardy ońaltý ortalyqtary, mádeniet jáne sport nysandary siiaqty jobalarǵa basymdyq berilýi kerektigin aitqan.
Saiasattanýshy jáne ekonomikalyq máselelerdi taldaýshy Ǵaziz Ábishev óziniń Telegram arnasyndaǵy jazbasynda Úkimettiń Ulttyq qor transfertterin odan ári paidalaný máselesine qatysty pikir bildirdi.
Onyń paiymynsha, Ulttyq qor qarajatynyń bir bóligin áleýmettik infraqurylymdy salýǵa baǵyttaý Úkimettiń Memleket basshysy bergen tapsyrmalaryn oryndaýy retinde qarastyrylýy múmkin.
«Sóz Ulttyq qor qarajatynyń belgili bir bóligin úsh jyldyq biýdjette josparlanǵan áleýmettik infraqurylymdy salýǵa baǵyttaý týraly bolyp otyr. Munda birneshe másele bar. Birinshiden, tek biýdjet qarajaty esebinen qurylys júrgizilse, bul protsess uzaqqa sozylady, al adamdar kúte almaidy. Mektepter, aýrýhanalar, joldar men kópirler qajet. Ásirese halyq tyǵyz ornalasqan ońtústik óńirlerde mundai nysandar qazir qajet. Ekinshiden, bul daǵdarys kezeńinde ekonomikany yntalandyrýǵa múmkindik beredi. Úshinshiden, álemdik infliatsiia jaǵdaiynda qurylysty keiinge qaldyrǵannan góri qazir júrgizgen tiimdi bolýy múmkin. Óitkeni aqsha da ýaqyt óte qunsyzdanady», – dep jazdy Gaziz Ábishev.
Úkimettiń qazirgi jospary boiynsha 2027 jyly Ulttyq qordan 2 trln teńge, 2028 jáne 2029 jyldary jyl saiyn 1,5 trln teńgeden nysanaly transfert alý kózdelgen. Bul qarajat asa mańyzdy nysandar men jalpyulttyq mańyzy bar jobalarǵa baǵyttalmaq. Sonymen qatar kepildendirilgen transfert 2027-2028 jyldary 2,43 trln teńgeden, 2029 jyly 2 trln teńgeden belgilenip otyr.
Osylaisha, aldaǵy úsh jylda Ulttyq qordan alynatyn qarajattyń bir bóligi áleýmettik jáne infraqurylymdyq máselelerdi jedel sheshýge jumsalmaq. Úkimet bul rette biýdjet qarajatyn tiimdi paidalanýdy jáne árbir jumsalǵan teńgeniń qaitarymyn arttyrýdy negizgi mindetterdiń biri retinde atap otyr.
