Qazaqstan Ulttyq Banki jańa investitsiialyq alaiaqtyq shemalary týraly eskertedi, dep habarlaidy dalanews.kz.
Áleýmettik jelilerde, messendjerlerde jáne forýmdarda teris piǵyldy adamdar investitsiialyq kompaniialardyń atynan «tokendelgen altynǵa», «asqan joǵary tabysty jasandy intellekt ázirlemelerine», «neirojeli negizindegi treider-robotqa» salynǵan qarajattan kepildi tabys týraly habarlamalar taratýda.
Alaiaqtar ózderin qarjylyq keńesshi retinde tanystyryp, «investitsiialyq platformanyń» nemese «kriptovaliýta servisindegi» joǵary tabystylyqtyń jalǵan statistikasyn kórsetedi jáne brokerlik nemese kriptovaliýta platformasynyń jasandy veb-saityna tirkelýge kómektesedi. Mundai saittarda naqty investitsiialyq qyzmettiń jalǵan kórinisi jasalady: grafikter, jasalǵan mámileler tarihy, jeke kabinet jáne qoldaý chaty kórsetiledi.
Senimdilik úshin teris piǵyldy adamdar paidalanýshynyń senimine kirý maqsatynda «paidanyń» azǵantai somasyn shyǵaryp berýge múmkindik beredi. Osydan keiin olar «biregei usynys», «tabystylyqtyń ósýi» nemese «erekshe tiimdi mámile» degen syltaýmen iri somany salýǵa kóndiredi. Paidalanýshynyń shotyndaǵy qarajat kólemi aitarlyqtai ulǵaiǵan kezde, aqshany shyǵarý múmkin bolmai qalady. Osy tusta alaiaqtar salyqtardy, komissiialardy nemese saqtandyrýdy tóleýdi talap etedi.
Sonymen qatar, óz áreketterine zańdylyq sipat berý úshin teris piǵyldy adamdar paidalanýshylarǵa mórler, qoiylǵan qoldar, seriialyq nómirler jáne basqa da derektemeleri bar jalǵan hattar men qujattardy jiberip otyrady. «Salyqtar men komissiialar» túrindegi tólemderdi alǵannan keiin teris piǵyldy adamdar bailanysqa shyǵýdy toqtatady, al platformaǵa kirý ruqsaty buǵattalady.
Ulttyq Bank qyzmetkerleri aýdio jáne videoqońyraýlar shalmaitynyn eske salamyz. Sondai-aq jeke tulǵalardyń shottaryna qyzmet kórsetpeidi, pailyq investitsiialyq qorlarǵa jáne ózge de qarjylyq ónimderge aqsha salýdy usynbaidy, aqshalai qarajatty saqtandyrýmen ainalyspaidy jáne halyqpen aqshalai esep aiyrysýdy júzege asyrmaidy. Alaiaqtyq áreketke tap bolǵan jaǵdaida Qazaqstan Respýblikasynyń quqyq qorǵaý organdaryna tiisti aryzben júginýge keńes beremiz, - deidi Ulttyq bank ókilderi.
