Búgin Ulttyq bank bazalyq mólsherlemege qatysty kezekti sheshimin jariialaidy. Qarjy sarapshysy Aibar Oljai qazirgi ekonomikalyq jaǵdaidy eskere otyryp, retteýshi mólsherlemeni 25 nemese 50 bazistik tarmaqqa tómendetýi múmkin ekenin jetkizdi, dep habarlaidy dalanews.kz.
Sarapshy óz boljamyn eldegi infliatsiia deńgeiiniń báseńdeýimen, AQSh-taǵy mólsherlemeniń ózgerissiz qalýymen bailanystyrdy.
"Meniń oiymsha, bazalyq mólsherlemeni 25 nemese 50 bazistik tarmaqqa tómendetý týraly sheshim qabyldanýy múmkin. Bul qazirgi ekonomikalyq jaǵdaiǵa sai keledi. Infliatsiia 10 paiyzdan tómen tústi. AQSh Federaldyq rezerv júiesi mólsherlemesin kótermegendikten, dollardyń odan ári arzandaýyna múmkindik bar. Sonymen qatar biyl Qazaqstan ekonomikasynyń ósimin 5 paiyzǵa jetkizý mindeti tur. Osy faktorlardy eskersek, bazalyq mólsherlemeni 16,25–16,5 paiyz aralyǵynda belgileý ońtaily sheshim bolar edi", – dedi Aibar Oljai.
Eske salaiyq, 5 maýsymda Ulttyq bank bazalyq mólsherlemeni 18%-dan 17%-ǵa deiin, 28 shildede 17%-dan 16,75%-ǵa deiin tómendetken edi. Retteýshi bul sheshimdi eldegi infliatsiianyń baiaýlaýymen túsindirdi.
Aita keteiik, kezekti sheshim 4 qyrkúiekte Astana ýaqytymen saǵat 12:00-de jariialanady.
Bazalyq mólsherleme - Ulttyq bank belgileitin negizgi paiyzdyq kórsetkish. Ol arqyly bank sektorynyń jalpy baǵyty aiqyndalyp, eldegi nesie men infliatsiia deńgeiine áser etedi. Bul kórsetkish boiynsha Ulttyq bank kommertsiialyq uiymdarǵa qysqa merzimdi nesie beredi jáne olardyń qarajatyn depozit retinde qabyldaidy.
Qarapaiym tilmen aitqanda, bazalyq mólsherleme - el ekonomikasynyń "baǵdarshamy". Ony kóterse, nesie alý qymbattaidy, al túsirse kerisinshe arzan nesie alý múmkindigi artady. Osylaisha, Ulttyq bank osy tetik arqyly aqsha ainalymyn rettep, baǵa turaqtylyǵyn saqtaýǵa tyrysady.
