Ulttyq quryltai sońǵy jyldary elimizdegi ózekti máselelerdi talqylap, olardy zańnamalyq turǵyda sheshýge baǵyttalǵan mańyzdy alańǵa ainaldy. Bul týraly Májilis depýtaty, tiisti komitet tóraǵasy Ashat Aimaǵambetov málimdedi, dep habarlaidy Dalanews.kz.
Onyń aitýynsha, quryltai – bilik pen qoǵam arasyndaǵy ashyq dialog ornatyp, naqty nátijelerge jetýge múmkindik beretin mehanizm.
“Ulttyq quryltai – bul jai ǵana pikir almasý emes, qoǵamdaǵy ózekti máselelerdi anyqtap, olardy zań júzinde bekitýge jáne naqty iske asyrýǵa baǵyttalǵan alań. Bul format naqty nátije berip otyr. Ótken jyly úshinshi quryltai qorytyndysy boiynsha 10 zań jobasy daiyndaldy, onyń 9-yna Prezident qol qoidy”, – dedi Aimaǵambetov.
Qabyldanǵan ózgerister:
•Qumar oiyn biznesine shekteý engizildi, onyń ishinde jarnamaǵa tyiym salý jáne boryshkerler men memlekettik qyzmetkerlerdiń qatysýyna shekteý qoiý qarastyrylǵan.
•Tarihi eskertkishter men tabiǵi nysandardy vandalizmnen qorǵaý sharalary kúsheitildi.
•Ǵalymdar, injenerler, qurylysshylar men agrarshylarǵa qurmetti ataq berý júiesi keńeitildi.
•Turmystyq zorlyq-zombylyq úshin qylmystyq jaýapkershilik engizilip, pedofiliia úshin ómir boiyna bas bostandyǵynan aiyrý jazasy bekitildi.
•“Aibyn” ordenine Sáǵadat Nurmaǵambetov, Baýyrjan Momyshuly jáne Rahymjan Qoshqarbaevtyń esimderi berildi.
•Barlyq ataý ózgeristeri endi ortalyq organnyń maquldaýymen ǵana júzege asatyn boldy.
•Esirtki qylmysy úshin jaza qatańdatyldy, onyń ishinde esirtki saýdasyn uiymdastyrýshylar men qoldaýshylarǵa ómir boiyna bas bostandyǵynan aiyrý jazasy qarastyrylǵan.
Sonymen qatar, arheologiia salasyn reformalaý boiynsha jumystar jalǵasýda. Qazir litsenziialaýdyń jańa standarttaryn engizý jáne zańsyz qazba jumystaryna qarsy sharalardy kúsheitý baǵytynda zań jobasy qaralýda.
Aimaǵambetovtyń aitýynsha, Ulttyq quryltai – Prezidenttiń “Halyq únine qulaq asatyn memleket” tujyrymdamasynyń bir bóligi. Quryltaida kóterilgen usynystar qoǵamnyń naqty suranystaryna negizdelgendikten, olar zańnamalyq deńgeide júzege asyrylyp, naqty ózgeristerge ákelýde.
