Qazaqstan Ulttyq qordyń 1 mlrd dollaryna AQSh-tyń infliatsiiadan qorǵalǵan memlekettik baǵaly qaǵazdaryn satyp almaq niette. Bul týraly QR Ulttyq Bank tóraǵasynyń orynbasary Áliia Moldabekova Bloomberg agenttigine bergen suqbatynda aitty, dep habarlaidy Dalanews.kz.
Ulttyq Bank tóraǵasynyń orynbasary AQSh prezidenti Donald Tramptyń saiasaty infliatsiiany údetip, álemdik ortalyq bankterdiń negizgi mólsherlemelerdi tómendetý úrdisin báseńdetýi múmkin dep sanaidy.
"Salyq jeńildikteri, saýda soǵysy, protektsionizm, ekonomikalyq yntalandyrý – munyń bári infliatsiiaǵa yqpal etetin faktorlar",- dedi Moldabekova basylymǵa bergen suqbatynda.
Sondyqtan Ulttyq Bank AQSh-tyń tutynýshylyq baǵalar indeksine bailanǵan ári paiyzdyq kiris ákeletin TIPS (Qazynashylyq infliatsiiadan qorǵalǵan baǵaly qaǵazdar) obligatsiialaryna shamamen 1 mlrd dollar investitsiialaýdy josparlap otyr. Bul investitsiialar aldaǵy eki-úsh aidyń ishinde júzege asyrylatyn bolady jáne damyǵan elderdiń táýelsiz zaem portfeliniń 10%-na deiin jetedi.
Aktivteri 59 mlrd dollardy quraityn satyp alynǵan TIPS (Treasury Inflation-Protected Securities) Qazaqstannyń Ulttyq qorynyń balansyna alynady, onyń 54 mlrd dollary joǵary kiris alyp otyrý úshin jinaq portfeline investitsiialanady.
TIPS-ten bólek, joǵary infliatsiia jaǵdaiynda jaqsy kiris bere alatyn basqa da aktivter bar, máselen jyljymaityn múlik jáne infraqurylym degendei. Moldabekovanyń aitýynsha, Ulttyq Banktiń balamaly investitsiialarǵa jaýapty bólimshesi jyljymaityn múlik qorlaryna investitsiia salyp úlgergen jáne infraqurylymdyq qorlarǵa investitsiia jasaý múmkindigin de qarastyryp jatyr.
Bloomberg Ulttyq Bank Ulttyq qordyń qarajatyn investitsiialaý strategiiasyn birtindep ózgertip jatqanyn jazady.
2023 jyly retteýshi organ damýshy naryqtardyń AQSh dollaryndaǵy korporativtik obligatsiialaryna investitsiialardy ulǵaitty, sondai-aq alǵash ret damyǵan elderdiń BB+ jáne BB reitingterge ie joǵary kiristi korporativtik obligatsiialaryn satyp aldy. 2024 jyly retteýshi organ qor portfelindegi aktsiialardyń úlesin 36%-dan 30%-ǵa deiin tómendetýdi josparlaǵan.
"Qor naryǵynyń qyzyp ketý qaýpi bar", degen Moldabekova, ásirese paiyzdyq mólsherlemelerdiń baiaý tómendeýi jaǵdaiynda aktsiialardyń qymbat bola túskenin basa aitady.
QR Ulttyq Banki Tramp saiasatynyń infliatsiialyq áserine qatysty boljamǵa ózi jalǵyz súienip otyrǵan joq. Niý-Iork Federaldy rezervtik bankiniń prezidenti Djon Ýiliams tarifter infliatsiialyq qysymdy kúsheitetinin aitty, al AQSh-tyń burynǵy Qarjy ministri Robert Rýbin saýda bajdary "infliatsiianyń óte aýyr qaýpin" týdyratynyn atap ótken.
"Naryqtar qazir turaqsyz", - dedi Moldabekova óz suqbatynda.
Qańtar aiynda AQSh-tyń tutyný baǵalarynyń indeksi 3% qurady. Onyń boljamy boiynsha, AQSh-taǵy infliatsiia jylyna shamamen 2,35% quraidy degen obligatsiialardaǵy deńgeiden de joǵary bolýy múmkin.
"Biz jyl sońyna deiin infliatsiia osy shekten joǵary bolady dep bajailaimyz", - dedi ol naryqtyq kútýlerge súiene otyryp.
Suqbat jariialanǵan sáttegi AQSh-tyń memlekettik obligatsiialarynyń kiristiligi eki jyldyq qaǵazdar úshin 4,019% jáne onjyldyqtar úshin 4,33%-dy qurady.
