Qazaqstanda bıznes pen halyq tarapynan kredıt alýǵa suranys artyp keledi. Biraq ıpoteka sektorynda ótinim azaıyp jatyr eken. Bul aqparat Ulttyq banktiń II toqsandaǵy saýalnamasynan belgili boldy. Retteýshi 19 qazaqstandyq bankke saýalnama júrgizgen.

İri bıznes tarapynan túsetin kredıt ótinimi 12 paıyzǵa ósken. Kóptegen iri bank ókilderiniń pikirinshe, bul kredıttik resýrstar qunynyń odan ári tómendep, taý-ken, munaı-gaz jáne qurylys salalaryndaǵy iri ınvestısıalyq jobalardyń jandanýyna, sondaı-aq jeńildetilgen kredıt beretin memlekettik baǵdarlamalarynyń qaıta bastalýyna jáne jańa túrleriniń iske qosylýyna baılanysty.

Orta bıznestiń kredıt alýǵa ótinimi — 25 paıyzǵa, shaǵyn bıznestiki 4 paıyzǵa ósken. Shaǵyn jáne orta bıznestiń kredıtterin maquldaý koefısıenti ótken toqsandaǵydaı 36% jáne 38% deńgeıinde qalǵan. Al iri bıznes sýbektileriniń kórsetkishi 8 paıyzǵa tómendegen.   

Jeke tulǵalar ıpotekaǵa suranysty azaıtypty. Al tutynýshylyq zaımdar suranysy jekelegen bankterdiń kredıt beretin sharttary qatańdatylǵanyna qaramastan áli de ósip jatyr. Kepilsiz tutynýshylyq zaımdardyń suranysynda aıtarlyqtaı ózgeris joq. Al avtokredıt kórsetkishi 10 paıyzǵa ósken. Alda III toqsanda avtokredıtter men kepilsiz tutynýshylyq zaımdarǵa suranys taǵy da ósýi múmkin dep boljam jasap otyr bank ókilderi.