قازاقستاندا بيزنەس پەن حالىق تاراپىنان كرەديت الۋعا سۇرانىس ارتىپ كەلەدى. ءبىراق يپوتەكا سەكتورىندا ءوتىنىم ازايىپ جاتىر ەكەن. بۇل اقپارات ۇلتتىق بانكتىڭ II توقسانداعى ساۋالناماسىنان بەلگىلى بولدى. رەتتەۋشى 19 قازاقستاندىق بانككە ساۋالناما جۇرگىزگەن.
ءىرى بيزنەس تاراپىنان تۇسەتىن كرەديت ءوتىنىمى 12 پايىزعا وسكەن. كوپتەگەن ءىرى بانك وكىلدەرىنىڭ پىكىرىنشە، بۇل كرەديتتىك رەسۋرستار قۇنىنىڭ ودان ءارى تومەندەپ، تاۋ-كەن، مۇناي-گاز جانە قۇرىلىس سالالارىنداعى ءىرى ينۆەستيسيالىق جوبالاردىڭ جاندانۋىنا، سونداي-اق جەڭىلدەتىلگەن كرەديت بەرەتىن مەملەكەتتىك باعدارلامالارىنىڭ قايتا باستالۋىنا جانە جاڭا تۇرلەرىنىڭ ىسكە قوسىلۋىنا بايلانىستى.
ورتا بيزنەستىڭ كرەديت الۋعا ءوتىنىمى — 25 پايىزعا، شاعىن بيزنەستىكى 4 پايىزعا وسكەن. شاعىن جانە ورتا بيزنەستىڭ كرەديتتەرىن ماقۇلداۋ كوەففيسيەنتى وتكەن توقسانداعىداي 36% جانە 38% دەڭگەيىندە قالعان. ال ءىرى بيزنەس سۋبەكتىلەرىنىڭ كورسەتكىشى 8 پايىزعا تومەندەگەن.
جەكە تۇلعالار يپوتەكاعا سۇرانىستى ازايتىپتى. ال تۇتىنۋشىلىق زايمدار سۇرانىسى جەكەلەگەن بانكتەردىڭ كرەديت بەرەتىن شارتتارى قاتاڭداتىلعانىنا قاراماستان ءالى دە ءوسىپ جاتىر. كەپىلسىز تۇتىنۋشىلىق زايمداردىڭ سۇرانىسىندا ايتارلىقتاي وزگەرىس جوق. ال اۆتوكرەديت كورسەتكىشى 10 پايىزعا وسكەن. الدا III توقساندا اۆتوكرەديتتەر مەن كەپىلسىز تۇتىنۋشىلىق زايمدارعا سۇرانىس تاعى دا ءوسۋى مۇمكىن دەپ بولجام جاساپ وتىر بانك وكىلدەرى.
