Parlament senaty otyrysynda Ulttyq bank tóraǵasy Erbolat Dosaev jeke tulǵalardyń kridetine qatysty suraqqa jaýap berdi.
Senat depýtaty Murat Baqtiiarulynyń aitýynsha, búginde ekinshi deńgeili bankterde jeke tulǵalarǵa tiesili qaryzdyń jalpy somasy 6 trillion teńgege jýyqtady. Al nesie alǵan 2 million adam óz qaryzyn qaitara almai otyr. Sonyń nátijesinde qaitarylmaǵan nesielerdiń somasy 3 trillion teńgege jetti.
Al bas bankir Dosaevtyń sózine qaraǵanda, jeke tulǵalardyń jalpy qaryzy - 6 trillion emes, 4 trillion 100 milliard teńge. Bul – resmi statistikanyń málimeti.
"Onyń ishinde bizdiń ipotekamyz, kepilsiz nesieler men avtonesieler bar. 2017-2018 jyldardyń ishinde bankter bergen osyndai nesielerdiń somasy 47 protsentke kóterildi. Endi, oǵan qatysty suraqtarymyz bar. Biraq búginde nesieni tólemegen adamdardyń sany 2 million emes, 670 000 adam bizdiń kredittik biýromyzda tur", - dedi Dosaev senat otyrysynda.
Qazir Ulttyq bank úkimetpen birlese otyryp, kómek berý sharalaryn ázirlep jatyr. Bul jumys eki aptanyń ishinde aiaqtalýy qajet.
"Aldymyzdaǵy eki jetiniń ishinde sol jumystardy birge bitiremiz dep oilap otyrmyz. Qandai kómek bere alatynymyzdy. Bir jaǵynan aiyppul men ósimaqyny bólemiz, sosyn qalǵan qaryzdardy... Sodan qandai kómek, qandai múmkinshilik bolady, búgin sony sanap jatyrmyz", - dedi Dosaev.
Origin: sputniknews.kz
