QR Ulttyq Bankiniń sarapshylar qaýymdastyǵy arasynda júrgizgen kezekti makroekonomikalyq saýalnamanyń nátijesi jariialandy. Onda keibir kórsetkishter nasharlatý turǵysynda qaita qarastyrylǵan, dep habarlaidy Dalanews.kz.
Munai baǵasy men ekonomikalyq ósim
2025 jyldyń mamyr aiynda saýalnamaǵa qatysqan sarapshylar munai baǵasyna qatysty stsenariilik sharttardy qaita qarady.
Oǵan sáikes, 2025 jylǵy Brent markaly munaidyń bir barreliniń medianalyq baǵasy 75,0-ten 69,3 AQSh dollaryna deiin tómendedi. 2026 jáne 2027 jyldarǵa arnalǵan kútýler tiisinshe 66,0 jáne 66,2 AQSh dollary deńgeiinde turaqtandy.
Qazaqstan ekonomikasynyń 2025 jylǵa arnalǵan ósim qarqyny boiynsha boljamdary 4,7%-ten 5,0%-ke deiin joǵary qarai qaita qaraldy. 2026 jáne 2027 jyldarǵa arnalǵan kútýler aldyńǵy boljamdaǵy deńgeide ózgerissiz qaldy: tiisinshe 4,5% jáne 4,3%.
Valiýta baǵamy
2025 jyldyń qorytyndysy boiynsha ulttyq valiýtaǵa shaqqanda 1 AQSh dollarynyń baǵamy ortasha shamada 513,9 teńge (aldynda 510 teńge delingen), 2026 jyly 540 teńge (aldyńǵy boljamda - 532 teńge jáne 2027 jyly 550 teńge bolady dep kútiledi.
Infliatsiia jáne bazalyq mólsherleme
Saýalnamaǵa qatysqandar sarapshylardyń infliatsiialyq kútýler boiynsha boljamy joǵarylaý úrdisin jalǵastyrýda. Osylaisha 2025 jylǵa arnalǵan boljam 10,6%-ten 10,7%-ke, 2026 jylǵa – 9,0%-ten 9,4%-ke, 2027 jylǵa – 6,1%-ten 6,8%-ke deiin kóterildi.
Infliatsiia boiynsha boljamdardyń ózgerýine bailanysty bazalyq mólsherlemege qatysty kútýler de qaita qaraldy.
Bazalyq mólsherleme boiynsha 2025 jyldyń sońyna arnalǵan medianalyq boljam 15,9%-ten 16,3%-ke deiin, 2026 jylǵa – 14,3%-ten 14,5%-ke deiin, 2027 jylǵa – 11,5%-dan 12,0%-ǵa deiin kóterildi.
Saýalnamaǵa Qazaqstan boiynsha makroekonomikalyq kórsetkishterdi taldaýmen jáne boljaýmen ainalysatyn 14 uiym qatysty. Respondentterdiń arasynda naryqtyń kásibi qatysýshylary, zertteý institýttary, halyqaralyq uiymdar, sondai-aq reitingtik agenttikter de bar.
Eske salatyn jait, makroekonomikalyq saýalnamada Ulttyq Banktiń boljamdary qamtylmaǵan. Ol Qazaqstandaǵy jáne álemdik naryqtardaǵy ahýaldyń damýyna qatysty naryqtaǵy kásibi qatysýshylardyń derbes pikirine, baǵalaýlaryna jáne kútýlerine sholý túrinde beriledi.
