Qazaqstan Respýblikasynyń Premer-ministri Oljas Bektenov «Samuryq-Qazyna» AQ direktorlar keńesiniń otyrysyn ótkizdi, dep habarlaidy dalanews.kz.
Oljas Bektenov Parlament palatalarynyń birlesken otyrysynda Prezident Qasym-Jomart Toqaev qoiǵan mindetterdi jedel oryndaýdyń mańyzdylyǵyn atap ótti.
«Memleket basshysy eldiń turaqty damýyn qamtamasyz etý boiynsha kúsh-jigerdi arttyrýdy tapsyrdy. Prezident ekonomikalyq ósý, kólik-logistikalyq, energetikalyq jáne tsifrlyq infraqurylymdy damytý boiynsha mindetter qoidy. Elimizdiń infraqurylymdyq qańqasyn nyǵaitý jolynda "Samuryq-Qazyna" qory da mańyzdy rólge ie. Barlyq jaýapty memlekettik organdar, onyń ishinde Qor basshylyǵy men toptyń kompaniialary ózderiniń kúsh-jigeri men resýrstaryn barynsha jumyldyryp, atalǵan aýqymdy jumysqa dereý kirisýi qajet», — dep atap ótti Oljas Bektenov.
Direktorlar keńesi otyrysynyń kún tártibinde Qor qyzmetiniń negizgi óndiristik jáne qarjylyq kórsetkishteri, negizgi investitsiialyq jobalardy júzege asyrý barysy qaraldy.
«Samuryq-Qazyna» AQ basqarma tóraǵasy Nurlan Jaqypov Memleket basshysynyń ekonomikany damytý jónindegi tapsyrmalaryn júzege asyrý aiasynda Qor sońǵy úsh jylda jalpy quny 3,3 trln teńge bolatyn 35-ten astam investitsiialyq jobany aiaqtaǵanyn baiandady. Jańa energetikalyq qýattar men elektr jelisi infraqurylymynyń nysandary paidalanýǵa berildi, munai-gaz salasynyń nysandary jańǵyrtyldy, temirjol jelileri men konteinerlik habtardy qosa alǵanda, kólik infraqurylymy keńeitildi. Sondai-aq halyqty aýyz sýmen qamtamasyz etý jáne óńirlerdi gazben qamtý jobalary júzege asyryldy.
Qordyń málimeti boiynsha biyl jalpy quny 3,3 trln teńge bolatyn 16 investitsiialyq jobany aiaqtaý josparlanyp otyr. Kólik salasynda «Moiynty – Qyzyljar» jáne «Darbaza – Maqtaaral» temirjol jelileriniń qurylysy, «Altynkól – Jetigen» jáne «Beineý – Mańǵystaý» ýchaskelerin jańǵyrtý, Dostyq – Alashankoý ýchaskesinde ekinshi joldardy salý, sondai-aq temirjol ýchaskelerinde avtobuǵattaý júiesin engizý kózdelgen. Munai-gaz jáne energetika salalarynda jylyna 1 mlrd tekshe metr gaz óńdeitin Qashaǵan ken ornynda gaz óńdeý zaýytyn, Air Liquide Munay Tech Gases kompaniiasymen birlesip júzege asyrylyp jatqan Pavlodar munai-himiia zaýytyndaǵy sýtegi óndirý qondyrǵysynyń, Almaty JEO-2-niń, Túrkistan oblysyndaǵy bý-gaz qondyrǵysynyń, sondai-aq ENI kompaniiasymen birlesip júzege asyrylyp jatqan gibridti elektr stansasynyń qurylysyn aiaqtaý kózdelgen. Tsifrlyq transformatsiia salasynda Qor Qosshy qalasynda derekterdi óńdeý ortalyǵynyń qurylysyn jáne Kaspii teńiziniń túbimen talshyqty-optikalyq bailanys jelisin salýdy aiaqtaýdy josparlap otyr. Qazan aiynda Qosshyda Qordyń esepteý qýatyn tórt ese arttyrýǵa múmkindik beretin jańa sýperkompiýterlik klaster engiziledi dep kútilýde. Sonymen qatar Qordyń kompaniialar tobynda biznes-protsesterdi avtomattandyrý jáne eńbek ónimdiligin arttyrý úshin JI negizinde sheshimder engizilýde.
2026 jyldyń basynan bastap on iri investitsiialyq jobanyń qurylysy bastaldy. Olar:
- Atyraý oblysyndaǵy býtadien óndirý zaýyty;
- Atyraý oblysyndaǵy «Polietilen» jáne «Býtadien» jobalaryna arnalǵan infraqurylym nysandary;
- Ekibastuz qalasyndaǵy Derekterdi óńdeý ortalyqtarynyń alqaby (DÓO);
- Jambyl oblysyndaǵy Masdar kompaniiasynyń qýaty 1 GVt bolatyn jel elektr stansasy (JES);
- Pavlodar oblysyndaǵy China Power International Holding kompaniiasynyń qýaty 1 GVt bolatyn JES;
- Qaraǵandy oblysyndaǵy Energy China kompaniiasynyń qýaty 500 MVt bolatyn JES;
- temirjol infraqurylymy nysandaryndaǵy LTE-R standartty symsyz bailanys jelileri;
- Semei jáne Óskemen qalalaryndaǵy jylý elektr ortalyqtary (JEO);
- Qazaqstannyń ońtústik óńirlerindegi elektr energiiasyn esepke alý úshin SMART aspaptaryn pilottyq joba retinde engizý.
Otyrysta Qordyń uzaqmerzimdi investitsiialyq baǵdarlamasyn iske asyrý josparlary da qaraldy. 2027–2029 jyldary jalpy quny 21 trln teńge bolatyn 36 investitsiialyq jobany júzege asyrý kózdelgen. Olar jańa energetikalyq nysandardyń, onyń ishinde jylý elektr ortalyqtary men jańartylatyn energiia kózderi salasyndaǵy jobalardyń qurylysyn, elektr jelisi infraqurylymyn damytýdy, munai-gaz jáne munai-gaz himiiasy salalaryndaǵy iri jobalardy júzege asyrýdy, sondai-aq temirjol infraqurylymyn salýdy qamtidy. Basymdyqtardyń qatarynda 5G jelisin, tsifrlyq infraqurylymdy damytýdy jáne Derekterdi óńdeý ortalyqtary alqabyn qurý bar.
Otyrys qorytyndysy boiynsha Premer-ministr «Samuryq-Qazyna» basshylyǵyna investitsiialyq jobalardyń ýaqtyly júzege asyrylýyn qamtamasyz etýdi, olardyń merzimderiniń saqtalýyna baqylaýdy kúsheitýdi, sondai-aq jobalardy júzege asyrý kezinde taýarlardaǵy, jumystar men qyzmetterdegi jergilikti qamtý úlesin ulǵaitý jóninde sharalar qabyldaýdy tapsyrdy.
