Maýsym aıynyń qorytyndysy boıynsha Qazaqstannyń oblystary men iri qalalarynda ınflásıa kórsetkishteri qanshalyqty ósti? Buǵan qatysty tolyqqandy málimettermen Ulttyq Banktiń baspasóz qyzmeti bólisti, dep habarlaıdy Dalanews.kz.

Ulttyq Banktiń málimetinshe, jyldyq ınflásıa 2025 jylǵy maýsymda 11,8%-ǵa deıin jedeldedi (mamyrda – 11,3%). Jyldyq ınflásıa 7 óńirde jalpy respýblıkalyq deńgeıden joǵary qalyptasty. Inflásıanyń eń joǵary máni Almaty qalasynda (13,8%) tirkeldi.

Ulttyq Bank azyq-túlik pen azyq-túlikke jatpaıtyn taýarlar, sondaı-aq aqyly kórsetiletin qyzmetter baǵasynyń jyldyq mándegi ósimi tıisinshe 10,6%-ǵa (mamyrda – 9,6%), 9,4%-ǵa (mamyrda – 9,0%) jáne 16,1%-ǵa deıin (mamyrda – 16,0%) qarqyn alǵanyn naqtylaıdy.

Qazaqstanda azyq-túlik taýarlarynyń baǵasy Aqmola oblysynda (12,5%), Qaraǵandy oblysynda (12,0%), Batys Qazaqstan, Soltústik Qazaqstan, Shyǵys Qazaqstan oblystarynda (11,9%-dan), Abaı oblysynda (11,7%), Shymkent qalasynda (11,5%), Jetisý oblysynda (11,4%), Astana qalasynda (11,1%), Túrkistan (11,0%) men Ulytaý (10,8%) oblystarynda el aýmaǵynda qalyptasqan deńgeıden (10,6%) joǵary boldy.

Azyq-túlikke jatpaıtyn taýarlardyń baǵasy Túrkistan (12,5%), Abaı (11,4%), Ulytaý (11,3%), Atyraý (11,0%), Aqtóbe (10,7%), Aqmola (10,6%), Soltústik Qazaqstan (10,3%), Qaraǵandy jáne Shyǵys Qazaqstan oblystarynda (10,1%), Qyzylorda oblysynda (9,9%), Astana qalasynda (9,7%) jáne Mańǵystaý oblysynda (9,5%) eldegi deńgeıden (9,4%) joǵary ósti.

Aqyly kórsetiletin qyzmetter baǵasy Almaty qalasynda (23,4%), Qaraǵandy oblysynda (18,1%), Jambyl oblysynda (16,7%), Batys Qazaqstan oblysy men Astana qalasynda (16,4%) jáne Atyraý oblysynda (16,2%) jalpy respýblıkalyq deńgeıden (16,1%) joǵary boldy.

2025 jylǵy maýsymda elimizde aılyq ınflásıa 0,8% boldy. Aılyq ınflásıanyń eń joǵary máni Aqmola jáne Abaı oblystarynda (1,3%) tirkeldi.