2024 jyly 11 qazanda QR Ulttyq banktiń Aqsha-kredit saiasaty komiteti bazalyq mólsherlemeni +/- 1 p.t. dálizi aralyǵynda jyldyq syiaqy mólsherlemesi 14,25% deńgeiinde saqtaý týraly sheshim qabyldady, dep habarlaidy Dalanews.kz.
Ulttyq bank baspasóz qyzmetiniń habarlaýynsha, jyldyq infliatsiia shildede ósken soń tamyz, qyrkúiek ailarynda baiyppen tómendeýin jalǵastyrdy.
"Ailyq infliatsiia ortasha tarihi mánderden jáne kóktem kezi men jaz basynda baiqalǵan deńgeilerden joǵary qalyptasyp otyr. Infliatsiianyń ornyqty bóligi tómendep keledi, biraq onyń qarqyny áli de baiaý", delingen Ulttyq bank habarlamasynda.
Qyrkúiek aiynda halyq kútken yqtimal infliatsiialyq kórsetkish kólemi ósti. Syrtqy ortanyń táýekelderine álemdik naryqtardaǵy azyq-túlik baǵasynyń ósýi jáne Reseidegi joǵary infliatsiia jatady.
"Ekonomika ishindegi infliatsiialyq qysym fiskaldyq yntalandyrý, tarifterdiń ósýiniń jalǵasýy, ornyqty ishki suranys, sondai-aq infliatsiialyq kútýlerdiń artýy esebinen saqtalyp otyr. Ortamerzimdi perspektivada infliatsiia boiynsha 5% maqsatqa qol jetkizý ustamdy qatań aqsha-kredit sharttaryn saqtaýdy qajet etedi. Táýekelder balansy proinfliatsiialyq jaqqa yǵysyp otyr. Infliatsiianyń ornyqty bóligi turaqty túrde tómendese jáne fiskaldyq alshaqtyqty qarjylandyrý máselesi tiimdi ári júieli sheshimin tapqan jaǵdaida bazalyq mólsherlemeni baiyppen jáne teńgerimdi túrde tómendetýge múmkindik bolady", delingen Ulttyq bank habarlamasynda.
Sonymen qatar jyldyq infliatsiia áli de targetten edáýir alshaq, degenmen 2024 jylǵy qyrkúiek aiynda ol 8,3%-ǵa deiin tómendedi.
"Jalpy infliatsiianyń dinamikasy Ulttyq Banktiń boljamyna sáikes keledi. Azyq-túlik taýarlarynyń neǵurlym tómen infliatsiiasy baǵa ósiminiń baiaýlaýyna úles qosýda. Degenmen aýyl sharýashylyǵy jáne óńdeý ónerkásibi ónimderin óndirýshiler baǵasy, sondai-aq importtyq baǵa qaita óse bastady. Jyldyq infliatsiianyń quramynda júrgizilip otyrǵan "Tarifti investitsiiaǵa aiyrbastaý" baǵdarlamasy jáne birqatar naryqtyq qyzmetterdiń qymbattaýy aiasynda aqyly qyzmetter baǵasy eń joǵary ósimdi kórsetti", - deidi Ulttyq banktegiler.
Ailyq infliatsiia qyrkúiekte 0,4% bolyp, ortasha tarihi mánnen joǵary qalyptasty (0,3%). Maýsymdyq faktorlardan tazartylǵan jalpy jáne bazalyq infliatsiia kórsetkishteri kóktemde jáne jaz basynda baiqalǵan deńgeiden joǵary qalyptasyp keledi.
Halyqtyń infliatsiialyq kútýleri qyrkúiek aiynda ósip, qubylmaly boldy. Biylǵa sarapshylardyń infliatsiialyq kútýleri de 8%-dan 8,4%-ǵa deiin ósti.
Ortalyq bankter qatań saiasat ustanǵandyqtan, jahandyq infliatsiia birtindep baiaýlap keledi.
"AQSh FRJ infliatsiianyń tómendeýine, sondai-aq eńbek naryǵynyń qalypqa kelýine bailanysty 2020 jyldan beri alǵash ret negizgi mólsherlemeni tómendetti. EOB qyrkúiek aiynda mólsherlemelerdi tómendetkenmen, onyń ritorikasy ózgergen joq. Iaǵni retteýshi infliatsiia boiynsha maqsatqa qoljetkizýge qansha ýaqyt qajet bolsa, sonsha ýaqyt aqsha-kredit sharttaryn shektep ustaýǵa niettenip otyr. Al Resei Banki bolsa, joǵary infliatsiia men proinfliatsiialyq táýekelderdiń kúsheiýi aiasynda negizgi mólsherlemeni 19%-ǵa deiin taǵy 100 bazistik tarmaqqa kóterdi. 2024 jyly Reseide infliatsiia boljamnan asyp túsýi yqtimal dep kútiledi. Osyǵan bailanysty retteýshi negizgi mólsherlemeni jýyrdaǵy otyrysta kezekti ret kóterý múmkindigin joqqa shyǵarmaidy", delingen Ulttyq bank habarlamasynda.
Bazalyq syiaqy mólsherlemesine qatysty aldaǵy josparly sheshim 2024 jylǵy 29 qarashada Astana qalasynyń ýaqytymen saǵat 12:00-de jariialanatyny naqtylanady.
