2024 جىلى 11 قازاندا ق ر ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى +/- 1 پ.ت. ءدالىزى ارالىعىندا جىلدىق سىياقى مولشەرلەمەسى 14،25% دەڭگەيىندە ساقتاۋ تۋرالى شەشىم قابىلدادى، دەپ حابارلايدى Dalanews.kz.
ۇلتتىق بانك باسپا ءسوز قىزمەتىنىڭ حابارلاۋىنشا، جىلدىق ينفلياسيا شىلدەدە وسكەن سوڭ تامىز، قىركۇيەك ايلارىندا بايىپپەن تومەندەۋىن جالعاستىردى.
"ايلىق ينفلياسيا ورتاشا تاريحي ماندەردەن جانە كوكتەم كەزى مەن جاز باسىندا بايقالعان دەڭگەيلەردەن جوعارى قالىپتاسىپ وتىر. ينفلياسيانىڭ ورنىقتى بولىگى تومەندەپ كەلەدى، ءبىراق ونىڭ قارقىنى ءالى دە باياۋ"، دەلىنگەن ۇلتتىق بانك حابارلاماسىندا.
قىركۇيەك ايىندا حالىق كۇتكەن ىقتيمال ينفلياسيالىق كورسەتكىش كولەمى ءوستى. سىرتقى ورتانىڭ تاۋەكەلدەرىنە الەمدىك نارىقتارداعى ازىق-تۇلىك باعاسىنىڭ ءوسۋى جانە رەسەيدەگى جوعارى ينفلياسيا جاتادى.
"ەكونوميكا ىشىندەگى ينفلياسيالىق قىسىم فيسكالدىق ىنتالاندىرۋ، تاريفتەردىڭ ءوسۋىنىڭ جالعاسۋى، ورنىقتى ىشكى سۇرانىس، سونداي-اق ينفلياسيالىق كۇتۋلەردىڭ ارتۋى ەسەبىنەن ساقتالىپ وتىر. ورتامەرزىمدى پەرسپەكتيۆادا ينفلياسيا بويىنشا 5% ماقساتقا قول جەتكىزۋ ۇستامدى قاتاڭ اقشا-كرەديت شارتتارىن ساقتاۋدى قاجەت ەتەدى. تاۋەكەلدەر بالانسى پروينفلياسيالىق جاققا ىعىسىپ وتىر. ينفلياسيانىڭ ورنىقتى بولىگى تۇراقتى تۇردە تومەندەسە جانە فيسكالدىق الشاقتىقتى قارجىلاندىرۋ ماسەلەسى ءتيىمدى ءارى جۇيەلى شەشىمىن تاپقان جاعدايدا بازالىق مولشەرلەمەنى بايىپپەن جانە تەڭگەرىمدى تۇردە تومەندەتۋگە مۇمكىندىك بولادى"، دەلىنگەن ۇلتتىق بانك حابارلاماسىندا.
سونىمەن قاتار جىلدىق ينفلياسيا ءالى دە تارگەتتەن ەداۋىر الشاق، دەگەنمەن 2024 جىلعى قىركۇيەك ايىندا ول 8،3%-عا دەيىن تومەندەدى.
"جالپى ينفلياسيانىڭ ديناميكاسى ۇلتتىق بانكتىڭ بولجامىنا سايكەس كەلەدى. ازىق-تۇلىك تاۋارلارىنىڭ نەعۇرلىم تومەن ينفلياسياسى باعا ءوسىمىنىڭ باياۋلاۋىنا ۇلەس قوسۋدا. دەگەنمەن اۋىل شارۋاشىلىعى جانە وڭدەۋ ونەركاسىبى ونىمدەرىن وندىرۋشىلەر باعاسى، سونداي-اق يمپورتتىق باعا قايتا وسە باستادى. جىلدىق ينفلياسيانىڭ قۇرامىندا جۇرگىزىلىپ وتىرعان "ءتاريفتى ينۆەستيسياعا ايىرباستاۋ" باعدارلاماسى جانە ءبىرقاتار نارىقتىق قىزمەتتەردىڭ قىمباتتاۋى اياسىندا اقىلى قىزمەتتەر باعاسى ەڭ جوعارى ءوسىمدى كورسەتتى"، - دەيدى ۇلتتىق بانكتەگىلەر.
ايلىق ينفلياسيا قىركۇيەكتە 0،4% بولىپ، ورتاشا تاريحي ماننەن جوعارى قالىپتاستى (0،3%). ماۋسىمدىق فاكتورلاردان تازارتىلعان جالپى جانە بازالىق ينفلياسيا كورسەتكىشتەرى كوكتەمدە جانە جاز باسىندا بايقالعان دەڭگەيدەن جوعارى قالىپتاسىپ كەلەدى.
حالىقتىڭ ينفلياسيالىق كۇتۋلەرى قىركۇيەك ايىندا ءوسىپ، قۇبىلمالى بولدى. بيىلعا ساراپشىلاردىڭ ينفلياسيالىق كۇتۋلەرى دە 8%-دان 8،4%-عا دەيىن ءوستى.
ورتالىق بانكتەر قاتاڭ ساياسات ۇستانعاندىقتان، جاھاندىق ينفلياسيا بىرتىندەپ باياۋلاپ كەلەدى.
"اقش فرج ينفلياسيانىڭ تومەندەۋىنە، سونداي-اق ەڭبەك نارىعىنىڭ قالىپقا كەلۋىنە بايلانىستى 2020 جىلدان بەرى العاش رەت نەگىزگى مولشەرلەمەنى تومەندەتتى. ەوب قىركۇيەك ايىندا مولشەرلەمەلەردى تومەندەتكەنمەن، ونىڭ ريتوريكاسى وزگەرگەن جوق. ياعني رەتتەۋشى ينفلياسيا بويىنشا ماقساتقا قولجەتكىزۋگە قانشا ۋاقىت قاجەت بولسا، سونشا ۋاقىت اقشا-كرەديت شارتتارىن شەكتەپ ۇستاۋعا نيەتتەنىپ وتىر. ال رەسەي بانكى بولسا، جوعارى ينفلياسيا مەن پروينفلياسيالىق تاۋەكەلدەردىڭ كۇشەيۋى اياسىندا نەگىزگى مولشەرلەمەنى 19%-عا دەيىن تاعى 100 بازيستىك تارماققا كوتەردى. 2024 جىلى رەسەيدە ينفلياسيا بولجامنان اسىپ ءتۇسۋى ىقتيمال دەپ كۇتىلەدى. وسىعان بايلانىستى رەتتەۋشى نەگىزگى مولشەرلەمەنى جۋىرداعى وتىرىستا كەزەكتى رەت كوتەرۋ مۇمكىندىگىن جوققا شىعارمايدى"، دەلىنگەن ۇلتتىق بانك حابارلاماسىندا.
بازالىق سىياقى مولشەرلەمەسىنە قاتىستى الداعى جوسپارلى شەشىم 2024 جىلعى 29 قاراشادا استانا قالاسىنىڭ ۋاقىتىمەن ساعات 12:00-دە جاريالاناتىنى ناقتىلانادى.
