QR Ulttyq Bankiniń Aqsha-kredit saiasaty jónindegi komiteti bazalyq mólsherlemeni +/- 1 p.t. dálizimen jyldyq 16,5% deńgeiinde belgileý týraly sheshim qabyldady. Sheshim qabyldaýda naqty derekter, jańartylǵan boljamdardy taldaý men infliatsiia táýekelderiniń balansyn baǵalaý kórsetkishteri eskerilgeni naqtylanady. Degenmen sarapshylar kútken makroekonomikalyq kórsetkishterdiń keibirine qatysty boljamdy Ulttyq Bank nasharlatý turǵysynda qaita qarap shyqqandaryn málimdedi, dep habarlaidy Dalanews.kz.
"Mamyr aiynyń qorytyndysy boiynsha jyldyq infliatsiia 11,3%-ǵa jetti. Sońǵy ailarda baǵanyń ósýinne túrtki bolǵan negizgi qozǵaýshy faktor – retteletin tarifter men naryqtyq qyzmetterdiń aitarlyqtai qymbattaýyna bailanysty servistik infliatsiia bolyp otyr. Baǵanyń ósý qarqyny azyq-túlik taýarlary boiynsha da jedeldegeni baiqaldy. Mamyrda ailyq infliatsiia tarihi dinamikadan aitarlyqtai asyp, 0,9% boldy. Bazalyq jáne maýsymdyq áserlerden tazartylǵan infliatsiia kórsetkishteri bir jylǵa eseptegende tiisinshe 10,1%-dy jáne 11,4%-dy qurady. Osynyń barlyǵy tutynýshylyq suranystyń qaita artýynan, óndiris shyǵyndarynyń ósýinen, sondai-aq fiskaldyq yntalandyrýdyń jalǵasýynan baǵaǵa qysym saqtalyp otyrǵanyn kórsetedi", delingen Ulttyq Bank túsiniktemesinde.
Infliatsiia eki jyl qatarynan údei túsetini boljanady
Mamyrda halyqtyń infliatsiialyq kútýleri sáýirdegi 12,2%-ǵa qaraǵanda 14,1%-ǵa deiin ósti. Bul keleshek infliatsiiaǵa qatysty qubylmalylyq pen belgisizdik saqtalyp qalǵanyn kórsetedi. Syrtqy sektor tarapynan da baǵaǵa qysym kúsheie tústi. Bul Reseidegi joǵary infliatsiianyń saqtalýyna, joǵary suranys pen valiýtalyq aýytqýlar aiasynda álemdik azyq-túlik baǵasynyń óse túsýine, sondai-aq saýda qaqtyǵystarynyń kúsheiýinen jáne shikizat taýarlary baǵasynyń qubylmalylyǵynan týyndaǵan joǵary belgisizdikke bailanysty. Jahandyq baǵa ornyqty túrde ósý úrdisinde qaldy.
"Saýda-sattyqtaǵy shielenis infliatsiialyq táýekelderdi kúsheitip, ónerkásip pen qyzmet kórsetý sektorynda iskerlik belsendilikti tejei tústi. Osy jaǵdailarda naryq tarapynan saiasatty odan ári jumsartýǵa qatysty kútýler bolǵanymen, ortalyq bankterdiń ritorikasy áli de ustamdy qalpyn saqtap otyr", - deidi Ulttyq Bank.
Sondai-aq Ulttyq Bank boljamdarynyń bazalyq stsenarii aiasynda Brent markaly munaidyń baǵasy boljamdy kezeńniń sońyna deiin orta eseppen barreline 60 AQSh dollaryna deiin tómendeý jaǵyna qaita qaralǵan.
Stsenarii sharttary baǵanyń naqty dinamikasyn jáne munai naryǵyndaǵy usynystyń suranystan asyp ketý yqtimalyn eskere otyryp túzetildi. 2025 jáne 2026 jyldarǵa arnalǵan infliatsiiaǵa qatysty boljam qaita qaraldy. Oǵan sáikes:
- 2025 jyly infliatsiia – 10,5-12,5%,
- 2026 jyly – 9,5-11,5% sheginde bolady dep kútiledi.
- 2027 jyldyń qorytyndysy boiynsha infliatsiia deńgeii 5,5-7,5%-ǵa deiin tómendeidi.
"Bul tejeýshi sipattaǵy aqsha-kredit saiasaty men aldaǵy salyq-biýdjet konsolidatsiiasy aiasynda biýdjettik qoldaý sharalarynyń birtindep qysqarýy nátijesi bolmaq.2025-2026 jyldar aralyǵynda infliatsiia boljamyn kóterý jaǵyna qaita qaraý azyq-túlik baǵasynyń ósýine, suranys saldarynan joǵary infliatsiialyq qysymnyń oryn alýyna jáne munai baǵasynyń tómendeýine negizdeledi. Ishki suranystyń kúsheiýi, syrtqy infliatsiianyń jedeldeýi jáne infliatsiialyq kútýlerdiń turaqsyzdyǵy boljamnyń negizgi táýekelderi bolyp qalýda.Ustamdy qatań aqsha-kredit saiasaty men fiskaldyq qatańdatýdyń josparly sharalary infliatsiiany tejeýge yqpal etedi. Bul rette JJM baǵasynyń naqty ósý qarqynyna, fiskaldyq tártiptiń kúsheiýine (Ulttyq qordan qarajat alýdy tómendetý jónindegi josparlardy iske asyrýdy qosa alǵanda), sondai-aq retteletin baǵalar men QQS mólsherlemeleriniń kóterilýinen bolatyn janama áserge bailanysty belgisizdik saqtalyp otyr", - deidi Ulttyq Bank bul rette.
Qazaqstannyń 2025 jylǵy JIÓ deńgeii 5-6%-dy quraýy múmkin
"2025 jyly Qazaqstan ekonomikasynyń ósý boljamy ishki suranystyń kúsheiýine jáne investitsiialyq belsendiliktiń ósýine bailanysty 5-6%-ǵa deiin kóterildi. 2026 jylǵa arnalǵan boljam 4-5% deńgeiinde jańartyldy. Bul rette 2025 jylǵy birshama ósýdi jáne munai baǵasynyń aldyńǵy boljammen salystyrǵanda tómendeý stsenarii aiasynda eksport ósiminiń baiaýlaýyn eskeriledi. 2026 jyly ekonomikalyq ósim ishki suranys pen munai óndirý kóleminiń artýy esebinen saqtalady. Keiin ósim Úkimet josparlaǵan qurylymdyq reformalardyń sátti júzege asýyna bailanysty bolady. Olardyń qatarynda negizgi kapitalǵa salynatyn investitsiia kólemin ulǵaitý, tikelei sheteldik investitsiialardy tartý jáne ekonomikany liberalizatsiialaý sharalary bar", delingen qujatta.
Bazalyq mólsherlemeniń qazirgi kólemi 2025 jyldyń sońyna deiin saqtalýy múmkin
Qalyptasqan joǵary infliatsiia buryn boljanǵan ýaqyttan da uzaq ýaqyt boiy ustamdy qatań aqsha-kredit sharttaryn saqtaýdy talap etedi. Táýekelder balansy proinfliatsiialyq jaqqa aýysqan. Bul bazalyq mólsherlemeni 2025 jyldyń sońyna deiin qazirgi deńgeide saqtalý yqtimaldyǵyn arttyrady.
"Qalyptasqan jaǵdaidy saqtaý infliatsiialyq kútýlerdi turaqtandyrýǵa, baǵa ósiminiń údeýine jol bermeýge jáne infliatsiiany 5%-dyq ortamerzimdi maqsatqa jetý jolynda ornyqty traektoriiaǵa qaitarýǵa baǵyttalǵan. Ulttyq Bank qajet bolǵan jaǵdaida bazalyq mólsherlemeni kóterýi de múmkin", - deidi retteýshi organ.
QR Ulttyq Bankiniń Aqsha-kredit saiasaty komitetiniń bazalyq mólsherleme boiynsha kezekti josparly sheshimi 2025 jylǵy 11 shildede Astana qalasynyń ýaqytymen saǵat 12:00-de jariialanady.
|
QR Ulttyq Bank boljamynyń negizgi ólshemderi, bazalyq stsenarii 2025 |
2026 | 2027 | |
| Brent munaiy, 1 barreli, AQSh dollary |
65,0 (73,0) |
60,0 (70,0) |
60,0 (70,0) |
| JIÓ ósimi, %, j/j |
5-6 (4,2-5,2) |
4-5 (4,2-5,2) |
3,5-4,5 (3,5-4,5) |
| TBI, 01.12.2024-01.12.2025 aralyǵy, % |
10,5-12,5 (10-12) |
9,5-11,5 (9-11) |
5,5-7,5 (5,5-7,5) |
| Aǵymdaǵy shot, JIÓ-den paiyzben |
-3,8 (-2,8) |
-4,0 (-3,2) |
-3,8 (-2,8) |
