Májilis depýtaty Baqytjan Bazarbek is júzinde emdeldi dep kórsetip, shyndyǵynda emdelmegen adamdardyń esebinen milliardtaǵan qarjy alǵan meditsinalyq uiymdardyń aqshasy keri qaitarylatynyn aitty, dep habarlaidy Dalanews.kz.
Bul týraly ol Májilis dálizinde málimdedi.
"MÁMS júiesi arqyly "pripiska" degen nárse bar. Ol - úlken qylmys, alaiaqtyq. Kóp meditsinalyq uiym sol "pripiska" arqyly milliardtaǵan aqshany qaltaǵa salyp otyr. Endi is júzinde meditsinalyq qyzmet atqarylmasa, al qaǵaz júzinde "meditsinalyq qyzmet atqaryldy, adam keldi, terapevtke kórindi" dep jazylsa, "pripiska" dep esepteledi. Endi ol aqsha qaitarylýǵa tiis. Ókinishke qarai, osy ýaqytqa deiin muny zańdastyryp alǵan. Iaǵni is júzinde meditsinalyq qyzmet atqarylǵan joq, biraq aqshany meditsinalyq uiymdar qaltasyna salyp otyr. Sóitip, kóptegen adamdy, memleketti, quqyq qorǵaý organdaryn aldap otyrdy", - dedi depýtat.
Aita keteiik, búgin Májiliste "Qazaqstan Respýblikasynyń keibir zańnamalyq aktilerine mindetti áleýmettik meditsinalyq saqtandyrý máseleleri boiynsha ózgerister men tolyqtyrýlar engizý týraly" zań jobasy baiandaldy.
Zań jobasy boiynsha Qazaqstanda meditsinalyq kómektiń biryńǵai paketi engiziledi. Oǵan qosa meditsinalyq uiymdar MÁMS júiesindegi qarajattyń jumsalýy týraly aqparatty jariialaýǵa mindetteledi.
