ءماجىلىس دەپۋتاتى باقىتجان بازاربەك ءىس جۇزىندە ەمدەلدى دەپ كورسەتىپ، شىندىعىندا ەمدەلمەگەن ادامداردىڭ ەسەبىنەن ميللياردتاعان قارجى العان مەديسينالىق ۇيىمداردىڭ اقشاسى كەرى قايتارىلاتىنىن ايتتى، دەپ حابارلايدى Dalanews.kz.
بۇل تۋرالى ول ءماجىلىس دالىزىندە مالىمدەدى.
"ءمامس جۇيەسى ارقىلى "پريپيسكا" دەگەن نارسە بار. ول - ۇلكەن قىلمىس، الاياقتىق. كوپ مەديسينالىق ۇيىم سول "پريپيسكا" ارقىلى ميللياردتاعان اقشانى قالتاعا سالىپ وتىر. ەندى ءىس جۇزىندە مەديسينالىق قىزمەت اتقارىلماسا، ال قاعاز جۇزىندە "مەديسينالىق قىزمەت اتقارىلدى، ادام كەلدى، تەراپيەۆتكە كورىندى" دەپ جازىلسا، "پريپيسكا" دەپ ەسەپتەلەدى. ەندى ول اقشا قايتارىلۋعا ءتيىس. وكىنىشكە قاراي، وسى ۋاقىتقا دەيىن مۇنى زاڭداستىرىپ العان. ياعني ءىس جۇزىندە مەديسينالىق قىزمەت اتقارىلعان جوق، ءبىراق اقشانى مەديسينالىق ۇيىمدار قالتاسىنا سالىپ وتىر. ءسويتىپ، كوپتەگەن ادامدى، مەملەكەتتى، قۇقىق قورعاۋ ورگاندارىن الداپ وتىردى"، - دەدى دەپۋتات.
ايتا كەتەيىك، بۇگىن ماجىلىستە "قازاقستان رەسپۋبليكاسىنىڭ كەيبىر زاڭنامالىق اكتىلەرىنە مىندەتتى الەۋمەتتىك مەديسينالىق ساقتاندىرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭ جوباسى باياندالدى.
زاڭ جوباسى بويىنشا قازاقستاندا مەديسينالىق كومەكتىڭ ءبىرىڭعاي پاكەتى ەنگىزىلەدى. وعان قوسا مەديسينالىق ۇيىمدار ءمامس جۇيەسىندەگى قاراجاتتىڭ جۇمسالۋى تۋرالى اقپاراتتى جاريالاۋعا مىندەتتەلەدى.
