Májilis depýtaty Ermurat Bapi Qazaqstannyń burynǵy prezidenti Nursultan Nazarbaevtyń Resei prezidenti Vladimir Pýtinge jaqynda jasaǵan saparyna qatysty ótkir málimdeme jasady, - dep habarlaidy Dalanews.kz.
Elmedia jobasynyń efirinde saiasatker bul kezdesý AQSh-ta daiyndalyp jatqan jańa qylmystyq is – "Qazaqgeit-2" oqiǵasyna qatysy bolýy múmkin ekenin boljady.
Bapidiń aitýynsha, AQSh-tyń Ádilet ministrligi buǵan deiin amerikalyq kompaniialar, saqtandyrý uiymdary jáne basqa da mekemelerdiń qyzmetin paidalanǵan álemdik kleptokrattarǵa qatysty derekter jinaýda.
"Qolda bar aqparat boiynsha, AQSh-ta "Qazaqgeit-2" dep atalatyn janjaldyń bastalýy yqtimal. Eger kleptokrattar amerikalyq sýbektilerdiń qyzmetin qoldanǵan bolsa, olarǵa qarsy qylmystyq ister qozǵalýy múmkin", – dedi depýtat.
Sondai-aq, Bapi burynǵy memleket basshylary basqa elderdiń zańdaryn buzǵan jaǵdaida olarǵa berilgen kepildikter olardy qorǵaýǵa qaýqarsyz ekenin atap ótti.
"Meniń oiymsha, Nazarbaevtyń Kremlge barýy, Pýtinmen kezdesýi jáne memlekettik qupiialar týraly zańǵa engizilgen ózgerister alda bolýy múmkin álemdik deńgeidegi janjalmen tikelei bailanysty. Biz tek osy "Pandora jáshiginiń" qashan ashylatynyn kútýimiz kerek", – dep qosty depýtat.
Sonymen qatar, Ermurat Bapi Qazaqstannyń burynǵy prezidentteri men olardyń otbasy músheleriniń densaýlyǵy men jeke ómiri týraly málimetterdi qupiialandyrýǵa baǵyttalǵan zańnamalyq ózgeristerdi synap tastady.
Aita keteiik, Qazaqgeit – amerikalyq kásipker Djeims Giffen men Qazaqstannyń burynǵy prezidenti Nursultan Nazarbaevqa qatysty jemqorlyq janjaly.
2003 jyldyń sáýirinde amerikalyq prokýrorlar Djeims Giffendi Nazarbaev pen Qazaqstannyń eks-premer-ministri Nurlan Balǵymbaevqa para berý arqyly Teńiz munai ken ornyna arnalǵan batystyq kompaniialardyń kelisimsharttaryn qamtamasyz etti dep aiyptady.
Djeims Giffen Parijge ushpaq bolǵan sátinde Niý-Iork áýejaiynda ustaldy. Keiin onyń elden qashpaq bolmaǵany, bul tek josparlanǵan iskerlik sapar ekeni anyqtaldy. Ońtústik Niý-Iork okrýginiń prokýratýrasy ony 1977 jylǵy Sheteldik jemqorlyqqa qarsy zańdy buzǵany jáne qarjy jymqyrǵany úshin aiyptady. Giffenniń janynda Qazaqstannyń diplomatiialyq pasporty bolǵan, biraq elde qos azamattyqqa tyiym salynǵan.
Sonymen qatar, prokýratýra Mobil munai kompaniiasynyń burynǵy menedjeri Braian Ýiliams III-ti Qazaqstanda biznesti júrgizý barysynda tólengen "otkattarǵa" bailanysty salyq tóleýden jaltardy dep aiyptady.
