ءماجىلىس دەپۋتاتى ەرمۇرات باپي قازاقستاننىڭ بۇرىنعى پرەزيدەنتى نۇرسۇلتان نازاربايەۆتىڭ رەسەي پرەزيدەنتى ۆلاديمير پۋتينگە جاقىندا جاساعان ساپارىنا قاتىستى وتكىر مالىمدەمە جاسادى، - دەپ حابارلايدى Dalanews.kz.

Elmedia جوباسىنىڭ ەفيرىندە ساياساتكەر بۇل كەزدەسۋ اقش-تا دايىندالىپ جاتقان جاڭا قىلمىستىق ءىس – "قازاقگەيت-2" وقيعاسىنا قاتىسى بولۋى مۇمكىن ەكەنىن بولجادى.

ءباپيدىڭ ايتۋىنشا، اقش-تىڭ ادىلەت مينيسترلىگى بۇعان دەيىن امەريكالىق كومپانيالار، ساقتاندىرۋ ۇيىمدارى جانە باسقا دا مەكەمەلەردىڭ قىزمەتىن پايدالانعان الەمدىك كلەپتوكراتتارعا قاتىستى دەرەكتەر جيناۋدا.

"قولدا بار اقپارات بويىنشا، اقش-تا "قازاقگەيت-2" دەپ اتالاتىن جانجالدىڭ باستالۋى ىقتيمال. ەگەر كلەپتوكراتتار امەريكالىق سۋبەكتىلەردىڭ قىزمەتىن قولدانعان بولسا، ولارعا قارسى قىلمىستىق ىستەر قوزعالۋى مۇمكىن"، – دەدى دەپۋتات.

سونداي-اق، باپي بۇرىنعى مەملەكەت باسشىلارى باسقا ەلدەردىڭ زاڭدارىن بۇزعان جاعدايدا ولارعا بەرىلگەن كەپىلدىكتەر ولاردى قورعاۋعا قاۋقارسىز ەكەنىن اتاپ ءوتتى.

"مەنىڭ ويىمشا، نازاربايەۆتىڭ كرەملگە بارۋى، پۋتينمەن كەزدەسۋى جانە مەملەكەتتىك قۇپيالار تۋرالى زاڭعا ەنگىزىلگەن وزگەرىستەر الدا بولۋى مۇمكىن الەمدىك دەڭگەيدەگى جانجالمەن تىكەلەي بايلانىستى. ءبىز تەك وسى "پاندورا جاشىگىنىڭ" قاشان اشىلاتىنىن كۇتۋىمىز كەرەك"، – دەپ قوستى دەپۋتات.

سونىمەن قاتار، ەرمۇرات باپي قازاقستاننىڭ بۇرىنعى پرەزيدەنتتەرى مەن ولاردىڭ وتباسى مۇشەلەرىنىڭ دەنساۋلىعى مەن جەكە ءومىرى تۋرالى مالىمەتتەردى قۇپيالاندىرۋعا باعىتتالعان زاڭنامالىق وزگەرىستەردى سىناپ تاستادى. 

ايتا كەتەيىك، قازاقگەيت – امەريكالىق كاسىپكەر دجەيمس گيففەن مەن قازاقستاننىڭ بۇرىنعى پرەزيدەنتى نۇرسۇلتان نازاربايەۆقا قاتىستى جەمقورلىق جانجالى.

2003 جىلدىڭ ساۋىرىندە امەريكالىق پروكۋرورلار دجەيمس گيففەندى نازاربايەۆ پەن قازاقستاننىڭ ەكس-پرەمەر-مينيسترى نۇرلان بالعىمبايەۆقا پارا بەرۋ ارقىلى تەڭىز مۇناي كەن ورنىنا ارنالعان باتىستىق كومپانيالاردىڭ كەلىسىمشارتتارىن قامتاماسىز ەتتى دەپ ايىپتادى.

دجەيمس گيففەن پاريجگە ۇشپاق بولعان ساتىندە نيۋ-يورك اۋەجايىندا ۇستالدى. كەيىن ونىڭ ەلدەن قاشپاق بولماعانى، بۇل تەك جوسپارلانعان ىسكەرلىك ساپار ەكەنى انىقتالدى. وڭتۇستىك نيۋ-يورك وكرۋگىنىڭ پروكۋراتۋراسى ونى 1977 جىلعى شەتەلدىك جەمقورلىققا قارسى زاڭدى بۇزعانى جانە قارجى جىمقىرعانى ءۇشىن ايىپتادى. گيففەننىڭ جانىندا قازاقستاننىڭ ديپلوماتيالىق پاسپورتى بولعان، ءبىراق ەلدە قوس ازاماتتىققا تىيىم سالىنعان.

سونىمەن قاتار، پروكۋراتۋرا Mobil مۇناي كومپانياسىنىڭ بۇرىنعى مەنەدجەرى برايان ۋيليامس IIIء-تى قازاقستاندا بيزنەستى جۇرگىزۋ بارىسىندا تولەنگەن "وتكاتتارعا" بايلانىستى سالىق تولەۋدەن جالتاردى دەپ ايىپتادى.