Saǵat 14:00-de Jambyl aýdany (Almaty oblysy) Úlken aýylyndaǵy №332 referendým ýchaskesinde turǵyndardyń 70 paiyzdan astamy daýys berdi. Aýyl turǵyndarynyń belsendiligi tań qaldyrady: qazirdiń ózinde 775 adam daýys berip úlgerdi.
– Búgin biz referendýmnyń barlyq qazaqstandyqtar úshin mańyzdylyǵyn baiqap otyrmyz, sailaý ýchaskesinde bári ádettegidei ótýde, eshqandai zań buzýshylyqtar tirkelgen joq, – dep atap ótti Úlkendegi referendým ýchaskelik komissiiasynyń tóraǵasy Áliia Úkibaeva.
Almaty oblysynda barlyǵy 643 referendým ótkizý ýchaskesi ashylyp, jumysy toqtaýsyz jalǵasýda. Respýblikalyq referendýmdy ótkizýge 655 referendým komissiiasy qatysady, onyń ishinde oblystyq jáne 11 aýmaqtyq komissiialar bar.
