16 tamyzdan bastap Úlken Almaty ainalma avtomobil jolymen (BAKAD) júrý tarifteri eki esege ósedi, dep habarlaidy dalanews.kz.
Qazaqstannyń Kólik ministrligi qoldanystaǵy aqyly joldy paidalaný qaǵidalaryna ózgerister engizdi. Jańa tarifter resmi jariialanǵannan keiin 10 kún ótken soń kúshine enedi.
Jańa tarif boiynsha jeńil avtokólikter úshin bir rettik jol júrý aqysy 605,5 teńgeni quraidy. Buǵan deiin bul sanattaǵy kólikter 302 teńge tólep kelgen. Al avtobýstar men júk kólikteri úshin tólem mólsheri kólik túrine qarai 692 teńgeden 1903 teńgege deiin belgilendi.
Atap aitqanda, 16 orynǵa deiingi avtobýstar men júk kótergishtigi 2,5 tonnaǵa deiingi júk kólikteri 692 teńge tóleidi. 32 orynǵa deiingi avtobýstar men 5,5 tonnaǵa deiingi júk kólikteri úshin tarif – 1211 teńge. Al 32 orynnan joǵary avtobýstar men 10 tonnaǵa deiingi júk kólikteri úshin jol aqysy 1384 teńge bolady. Júk kótergishtigi 10-15 tonna aralyǵyndaǵy kólikter 1730 teńge, al 15 tonnadan asatyn júk kólikteri men tirkemeli tehnikalar 1903 teńge tóleidi.
Sonymen qatar ailyq jáne jyldyq abonementterdiń quny ózgerissiz qalady. Ailyq abonement jeńil kólikter úshin 2162 teńge bolsa, kólik túrine qarai 10 812 teńgege deiin barady. Al jyldyq abonement quny 21 625 teńgeden bastalyp, aýyr júk kólikteri úshin 108 125 teńgege deiin jetedi.
Júrgizýshiler úshin 50 paiyzdyq jeńildik te saqtalady. Ol jol aqysyn ýchaskege kirmei turyp aldyn ala tólegende nemese joldan ótkennen keiin jeti jumys kúni ishinde ótegen jaǵdaida qoldanylady.
Aita keteiik, Úlken Almaty ainalma avtomobil joly 2023 jyldyń maýsymynda paidalanýǵa berilgen. Uzyndyǵy 66 shaqyrym bolatyn aqyly ainalma jol Almaty qalasyn ainalyp ótýge múmkindik beredi jáne tranzittik kólik aǵynyn azaitýǵa baǵyttalǵan.
