Ulytaý oblysynda qoǵam belsendisi, úsh balanyń anasy Ásel Aitmaǵanbetova áleýmettik jelidegi syni beinejazbalary úshin 495 myń teńge kóleminde aiyppul tóleýge mindetteldi. Ákimshilik is oblys ákimdiginiń bastamasymen qozǵalǵan, dep habarlaidy Dalanews.kz.
Aitmaǵanbetova 2025 jyldyń mamyr aiynda Qostanaidan Jezqazǵanǵa qonys aýdarǵan. Onyń aitýynsha, qaladaǵy infraqurylymdyq ahýal men turǵyndardyń turmys deńgeii kútpegen jerden teris áser qaldyrǵan.
“Sýdyń túsi lai, filtr de kómektespeidi. Adamdar ýlanýda, onkolog maman joq. Qala soǵystan keiingi kúidi eske salady. Jumys tapshy, al bar jumysqa turý úshin para suralady. Osy máselelerdiń bárin beinejazbalarymda kórsettim”, – deidi ol Orda.kz tilshisine bergen suhbatynda.
Ásirese kópshiliktiń nazaryn aýdartqan beinerolikterdiń biri Jezqazǵandaǵy kópsalaly oblystyq aýrýhananyń jaǵdaiyna arnalǵan jazba bolǵan. Osy jariialanymnan keiin, 18 maýsym kúni Áseldi politsiia departamentine “túsindirý jumystary” úshin shaqyrǵan.
Kóp uzamai, oblys ákiminiń shaǵymynan keiin is sotqa ótip, sot sheshimi belsendiniń paidasyna emes, ákimdik paidasyna shyqty. Nátijesinde Aitmaǵanbetova 495 myń teńge aiyppul tóleýge májbúr.
“Meniń oiymsha, bul jaza shynaiy problemalardy ashyq kótergenim úshin berilgen jaýap”, – deidi Ásel Aitmaǵanbetova.
