Bul týraly Ýkrainanyń Qorǵanys ministrligine qarasty Barlaý qyzmeti málimdedi dep habarlaidy Dalanews.kz.
Agenttik ókili Vadim Skibitskiidiń aitýynsha maidan dalasynda myńdaǵan sarbazynan aiyrylyp, áskeri tehnikasy taýsylýǵa shaq turǵan Resei ózi sekildi avtokrat elderden alaqan jaiyp, kómek suraýda.
Zamanaýi qarý-jaraqqa muhtaj Kreml buǵan deiin Irannyń aldyna barǵan, keiinnen Soltústik Koreia men Qytaidyń esigin qaqqan.
Al Qazaqstan men Ózbekstan biligi astamshyl, agressor elge Batys sanktsiialaryn ainalyp ótýge járdemdesip jatqany jaiy bar.
Sói degen Skibitskii qudai súier qylyǵy joq Kreml kósemimen aýyz jalasqan elderdi sanktsiiamen jazalaýdy suraýda.
«Máskeýge Irannan aldyratyn otty qarý azdyq etip otyr. Olar Qytai men Soltústik Koreianyń aiaǵyna jyǵylyp, maidan dalasynda jalań qolmen urysyp, jalańbut júrgen áskerine qol ushyn sozýdy surap otyr. Dál osy ótinishpen qyrǵyz biligine shyǵyp, Japarovty qolqalaǵan. Máskeý Bishkekten «Smerch» men «Ýragan» sekildi zymyran keshenderine qajetti oq-dári suraǵan», – dedi Skibitskii La Repubblica basylymyna bergen suhbatynda.
Ýkrain barlaýshysy Qazaqstan men Ózbekstannyń Batystyń kózin ala berip, Reseige járdemdesip otyrǵanyn aitady.
«Astana men Tashkent sanktsiia saldarynan joǵary tehnologiiaǵa zárý bop qalǵan Reseige óndiristik maqsattaǵy, alaida qarý-jaraq jasaýǵa da jarai beretin komponentterdi saýdalap otyr. Bulardyń basym bóligi atalǵan elderge Amerika men Japoniiadan keledi. Máskeý azamattyq, turmystyq maqsattaǵy komponetterdi qajetine jaratyp, raketa jasaýǵa paidalanýda», – deidi Skibitskii.
Ýkrain barlaýshy Máskeýdiń zamanaýi qarý-jaraq jasaityn potentsialy joq dep paiymdaidy, osy sebepti ózge elderden járdem suraýǵa májbúr.
